तितोपाटी- वैदेशिक रोजगारिका लागि यूनाइडेट अरब इमिरेट्स(यूएई)को दुबईमा पुगी बिरामी भएर अलपत्र बनेका बिक्रम जिम्बालाई प्रवासमा रहेका युवाहरुले उद्दार गरी नेपाल फर्काएका छन् ।
मकवानपुर मनहरी-३ हाँडीखोलाका बिक्रमलाई जापान, यूएई, कतार, साउदीलगायतका देशमा रहेका युवाहरुले आर्थिक् सहयोग जुटाएर बिहीबार नेपाल फर्काएका हुन् ।
दुबईमा एक कम्पनीमा कार्यरत जिम्बा तीन महिनाअघि काम गर्दागर्दै बेहोस भई ढलेका थिए । उनको उपचारको क्रममा पेटको अप्रेशन भयो । उनको उपचार नसकिँदै भिसाको अवधि सकियो । अस्पतालमा उपचार हुँदै गर्दा भिसा सकिएपछि उनी बेसाहारा बनेका थिए । अवैधानिक बनेपछि नेपाल फर्कन पनि समस्या भएको र काम पनि नपाएपछि उनी अलपत्र अवस्थामा थिए ।
अर्जुन सुनाम, श्रीराम रिजाल(जापान) लगाएतको सकृयातामा एक हप्ताको अवधिमा एक लाख रुपैयाँ जुटाएर बिक्रमलाई नेपाल फर्काइएको हो ।
बिक्रमको नेपालमा आफ्नै अभिभावक छैनन र उनी ठुलो बुवाको घरमा बस्ने गरेका थिए । नेपाल फर्किएका उनलाई दिदी समृद्धि लामाको जिम्मा लगाइएको छ । उनको थप उपचारको लागि हाँडीखोला निवासी सञ्जीव पाठक र मनहरी हस्पिटलका सिनियर अहेब ज्योतिराज लुइटेल लगायतको टिमले पहल गरिरहेका छन् ।