जुनै जोगी आएपनी, लाग्छ कानै चिरे जस्तो।
अनेकौं ती बाहनामा,देश र जनता पिरे जस्तो।
ब्यक्तिगत सङ्गै हजुर, दलिय त्यो स्वार्थ राखि,
बिरालो नि बाघ बनी,सत्ता भित्र छिरे जस्तो।
शिक्षा,स्वास्थ,खानेपानी,संचार अनि यातायात,
बिकासको सबै काम ,भा’छन् झारा तिरे जस्तो।
हिजो अस्ति गरेका ति, ब्यवहार हेर्दा खेरी,
दुनियाँ कै नजरबाट, गिर्न सम्म गिरे जस्तो।
सहि गलत नछुट्याइ, अघि पछि हिड्नेहरु,
अन्धभक्त भइ उस्कै,झोली तुम्ला भिरे जस्तो।
प्रतिमा शिवाकोटी
कालिन्चोक गा. पा ८, सुनखानी, दोलखा,
बागमती प्रदेश ।
(रचना: २०७८ बैशाख ३१ शुक्रबार)
