तितोपाटी- एसिड आक्रमणका अभियन्ता उज्वल विक्रम थापाले अटो मोवाईल्स, सोलार पसल, सुन पसल, दुध डेरी तथा हार्डवेयरहरुमा एसिड खुले आम प्रयोग र विक्री वितरण भईरहेको बताएका छन । स्थानीय प्रशासनले इजाजत नदिई एसिडको प्रयोग समेत गर्न नमिल्ने भएकाले त्यसको अनुगमन र नियमन गर्ने, प्रयोगका लागी जिल्ला प्रशासन कार्यालयले इजाजतलाई व्यवस्थित बनाउनुपर्नेमा जोड दिएका छन ।
मानवीय त्रुटि वा नियतका कारण एसिडको गलत प्रयोग हुनबाट रोक्न आवश्यक रहेको समेत उनले बताएका छन । शुक्रबार पत्रकारहरुसँग सिन्धुलीमाढीमा छलफल गर्दै उनले सरकारले ल्याएको अध्यादेशले एसीड पीडितहरुलाई मलम लगाउने काम गरेको बताए ।
उनले खुलेआम हुने एसिडको विक्री वितरण रोक्न र प्रयोगलाई व्यवस्थित गर्न आवश्यक रहेको बताएका छन । उनले भनेका छन, ‘एसीड आक्रमणबाट हुने शारीरिक क्षति, त्यसको पीडा र जलन कल्पना गर्न नसकिने छ । यसको उपचार खर्च पनि महंगो छ । यसलाई मानवीय क्षतिमा दुरुपयोग हुन नदिऔं ।’
पछिल्ला समयमा भएका एसिड आक्रमणका घटनाहरु प्रायः दुध डेरी, हार्डवेयर पसलमा खुलेआम विक्री भएको र त्यसको दुरुपयोग भएको पाईएकाले त्यसलाई नियन्त्रण गर्न स्थानीय प्रशासनले अनुगमन र नियन्त्रणलाई प्रभावकारी बनाउनुपर्नेमा जोड दिए ।
उनले सबै खाले जलनका कारण पीडित भएकाहरुका लागि सरकारले निशुल्क उपचार गर्नुपर्नेमा पनि जोड दिएका छन । ‘जलनको घाउको उपचार महंगो छ, सामान्य नागरिकले उपचार गर्नै सक्दैन । सरकारले निशुल्क उपचार गर्नुपर्छ,’ उनले भने । उनले सिन्धुली जिल्लालाई तेजाव मुक्त जिल्ला बनाउनुपर्नेमा समेत जोड दिएका छन ।
उनले तेजाव लगाएत जलनबाट किर्तिपुर अस्पतालमा मात्रै महिनामा १० वटा केश र जाडो महिनामा महिनामा ३ सय केश आउने गरेको बताउँदै नेपालमा स्किन बैंकको आवश्यकता रहेको बताए । जलनका विरामीको उपचारका लागि स्किन नपाउने अवस्था रहेको बताउँदै नेपालमा स्किन बैंकको आवश्यकता रहेका उनले बताए ।
