दलको भोगी प्रकृति पनि
नेपाली लोक छन्द(झ्याउरे )
*********************
चल्दैछ आज लाटाको देशाँ गाँडाको रजाईं
पुत्लाले पनि हिँडेको रैछ समुह बनाई ।१ ।
मण्डली बिना बग्दैन नदी आगोले पोल्दैन
छिमेकी साथी फरक दल चुईँक्क बोल्दैन ।२ ।
माहुरी जस्तो जमात यहाँ बन्दैन पुत्लाको
मपाईँ ठूलो देखिन्छ फेरि यी नाथे भुत्लाको ।३ ।
विचरा एक्लो भ्यागुतो फेरि कुनामा बसेको
कसैको खुट्टा तानौँला भनी कम्मरै कसेको ।४ ।
बिरालो पनि सुटुक्क फेरि दलमा छिरेछ
मिलेन भाग सिद्धियो दूध रिसाई हिँडेछ ।५ ।
अत्यन्त बाठो ब्वाँसोको हित चितुवा सँग भो
त्यसैले होला मासुको भाग अलिक मिलेको ।६।
सुर्यले भन्छ मिल्दैन ताप दलमा नलागे
चन्द्रको बोली धाँदली भयो बस्दिन म भागेँ ।७ ।
वर्षाले भन्छ दरिलो दल मेरो नि बन्दैछ
दलको भोगी प्रकृति पनि चिहान खन्दैछ ।८ ।
हरि शर्मा (सुबेदी)
गलकोट- नुवाकोट, बाग्लुङ, नेपाल
हाल: मिसिगन अमेरिका।
