गजल
-तारा अर्याल
ओइलिएको फुल सरि झर्नु छ एक दिन ।
थाहा छैन कहिले हो तर मर्नु छ एक दिन ।।
जन्म दिने बुवा आमा आफ्ना आफन्तहरु
नचाहेर पनि छाडी टाढा सर्नु छ एक दिन ।।
माया प्रेमको जाल झेलमा जेलिन पुगेको
जीवन सकिने एक जंघार तर्नु छ एक दिन ।।
धन सम्पती छ भनी जति घमण्ड गरे पनि
अदृश्य यो कालको शरण पर्नु छ एक दिन ।।
पञ्च तत्वको यो शरीर समय सकिना साथ
लगेर मृत्युको अंगालोमा भर्नु छ एक दिन ।।
कसैलाइ ढिलो त कसैलाइ छिटो मात्रै हो
सबैले अन्त्यको सामना गर्नु छ एकदिन ।।
