भारतीय विदेश मन्त्रालयले नेपालका प्रधानमन्त्री वालेन्द्र शाहलाई भारतको औपचारिक भ्रमणका लागि निमन्त्रणा पठाइसकेको पुष्टि गरेको छ। मन्त्रालयका प्रवक्ता रणधीर जैसवालले नियमित पत्रकार सम्मेलनमा यसबारे जानकारी दिँदै निमन्त्रणा पठाइएको स्वीकार गरे। यद्यपि, भ्रमणको मिति, अवधि र एजेन्डाबारे अहिले नै सार्वजनिक गर्न नसकिने उनले बताए।
पत्रकार सम्मेलनका क्रममा प्रधानमन्त्री शाहका प्रमुख राजनीतिक सल्लाहकार कुमार बेनले हालै भारतमा राष्ट्रिय सुरक्षा सल्लाहकार अजित डोभालसँग गरेको भनिएको भेटवार्ताबारे पनि प्रश्न उठाइएको थियो। त्यसमा प्रवक्ता जैसवालले उक्त भेटबारे आफूलाई कुनै औपचारिक जानकारी नभएको प्रतिक्रिया दिए। साथै, प्रधानमन्त्री शाहको भारत भ्रमण छिट्टै हुने विषयमा पनि उनले थप टिप्पणी गर्न चाहेनन्।
भारतीय पक्षले औपचारिक निमन्त्रणा पठाइसकेको पुष्टि गरेसँगै नेपाल–भारतबीच उच्चस्तरीय राजनीतिक तथा कूटनीतिक संवाद थप सक्रिय हुने संकेत देखिएको छ। अब दुवै देशबीच भ्रमणको मिति र छलफलका एजेन्डा तय हुने अपेक्षा गरिएको छ।
