पश्चिम अफ्रिकी मुलुक नाइजरमा सैनिक विद्रोह भएको छ । सेनाको एक टोलीले राष्ट्रिय टेलिभिजनबाट विद्रोहको घोषणा गर्दै राष्ट्रपतिलाई अपदस्त गरेको दाबी गरेको छ ।
सैन्य टोलीले राष्ट्रपति मोहम्मद बाजुमलाई बुधबार बिहानैदेखि सेनाले नियन्त्रणमा लिएको छभने देशको संविधान विघटनका साथै सबै संस्था निलम्बन गरिएको घोषणा पनि गरेको छ । सेनाले देशको सिमाना बन्द गरेको बताएको छ ।
दक्षिण अफ्रिकामा इस्लामिक चरमपन्थीविरुद्धको लडाइँमा बाजुम पश्चिमा राष्ट्रको मुख्य सहयोगी रहँदै आएका थिए । नाइजरको दुई छिमेकी राष्ट्र माली र बुर्किना फसोमा चरमपन्थीको बढ्दो प्रभावका कारण पछिल्ला वर्षमा ‘कू’ को सामना गरिरहेको छ ।
बुधबार गरिएको सम्बोधनमा कर्णेल मेजर अमाडु अब्ड्रामाने अन्य नौ जना सैनिकहरूसँग उपस्थित भएका थिए । उनले सम्बोधनमा भने, ‘हामी, रक्षा र सुरक्षा बलहरू, ले यो शासनलाई अन्त्य गर्ने निर्णय लिएका छौँ । देशको सुरक्षाको स्थिति निरन्तर बिग्रेको तथा आर्थिक र सामाजिक अवस्था खस्किएको कारण यो निर्णय लिइएको हो ।’
