तितोपाटी- नेकपा एमालेको वरिष्ठ नेता माधवकुमार नेपाल समूह प्रधानमन्त्री तथा पार्टी अध्यक्ष केपी शर्मा ओलीले बोलाएको संसदीय दलको बैठकमा सहभागी हुने भएको छ ।
शुक्रबार कलंकीको मेगा पार्टी प्यालेसमा बसेको नेपाल समूहका केन्द्रीय सदस्यहरुको बैठकले प्रधानमन्त्री ओलीले बोलाएको संसदीय दलको बैठकमा सहभागी हुने निर्णय गरेको स्थायी कमिटी सदस्य सुरेन्द्र पाण्डेले जानकारी दिए । प्रधानमन्त्री ओलीले शुक्रबार दिउँसो ३ बजे बस्ने गरी पार्टीको संसदीय दलको बैठक बोलाएका छन् । प्रधानमन्त्री ओलीले बोलाएको संसदीय दलको बैठकमा सहभागी भएर आफ्ना धारणा राख्ने निर्णय भएको पाण्डेले बताए । यसअघि प्रधानमन्त्री ओलीले बोलाएको संसदीय दलको बैठकमा नेपाल समूह सहभागी भएको थिएन ।यस्तै, नेपाल समूहको बैठकले तत्काल पार्टीको स्थायी, पोलिटब्युरो र केन्द्रीय कमिटीको बैठक बोलाउन माग गर्ने निर्णय गरेको केन्द्रीय सदस्य ठाकुर गैरेले जानकारी दिए ।
