म्याग्दी – म्याग्दी जिल्लाको मंगला गाउँपालिका–३ र बेनी नगरपालिका–४ को सिमनामा बग्ने अर्जे खोलामा मोटरेवल पुल नहुँदा बर्षायाममा स्थानीयलाई धेरै सास्ती भएको छ ।
म्याग्दीको सदरमुकाम बेनी नगरपालिका र मंगला गाउँपालिका– ३, ४, ५ र बाग्लुङ जिल्लाको ताराखोला गाउँपालिका जोड्ने सडकमा गुड्ने ढुवानीका गाडी, प्राइभेट तथा सार्वजनिक गाडीका लागि अर्जे खोलामा मोटरेवल पुल नहुँदा बर्षायाममा स्थानीयले वर्षेनी सास्ती भोग्नु परेको छ ।
अर्जे खोलामा बर्षायाममा पानीको वहाव निकै बढ्ने गर्छ । जब बर्षायाम शुरु हुन्छ अनि मंगला गाउँपालिका– ३ र ४ का स्थानीयलाई आवतजावत गर्न निकै समस्या परेको छ । साथै खाद्यान्नका लागि ढुवानीका गाडी समेत बर्षायाममा अर्जे खोलामा पानीको वहाव बढे्ने हुनाले समयमा पुग्न नसक्नाले गाउँमा खाद्यान्नको समस्या हुने गरेको छ । गाउँमा उत्पादन भएका तरकारी, फलफुल, दुध लगायतका सामान बेनी नगरपालीका सम्म पु¥याउन पनि कठिन भएको स्थानीयको गुनासो छ । त्यस्तै, सरकारी कामकाजका लागि पनि ज्यान जोखिममा राखेर खोला तर्नुपरेको स्थानीयको गुनासो छ । अर्को बैकल्पिक मोटर बाटो नभएको हुँदा २ देखी ३ घन्टा सम्म पर्खिएर पानीको वहाव अलि कम भए पछि चालक सहित यात्रुले आफ्नो ज्यान जोखिममा राखेर खोलामा गाडी तार्ने गरेका छन् ।
अर्जे खोलामा मोटरेवल पुल निर्माणको लागि सरोकारवाला कसैले पनि चासो नदिएको गतिशिल युवा क्लबका सचिब शुवास श्रेष्ठले बताएका छन् । उनले भने बर्षायाममा अर्जे खोलामा पानीको वहाव निकै बढ्छ । एक दिन ठुलै दुर्घटना हुन सक्छ । यस बिषयमा सरोकारवालले ध्यान दिनु जरूरी छ । गाउँका जन-प्रतिनिधि, बुद्धिजिवी समेतले अर्जे खोलामा मोटरेवल पुल निर्माण गर्न कुनै चासो नदेखाएको स्थानीयको गुनासो छ।
तस्विर – शुवास श्रेष्ठकाे फेसबुकवालबाट
