तितोपाटी- विश्वचर्चित नेपाली युवा क्रिकेटर सन्दीप लामिछानेलाई अमेरिकी दूतावासले भिसा रिभ्यू गर्न फेरि बोलाएको छ। मंगलबार बिहान अन्तर्वार्ताका लागि पुगेका सन्दीपलाई अमेरिकाले भिसा दिन अस्वीकार गरेको थियो। तर दिउँसो फेरि बोलाएपछि सन्दीप दूतावास पुगेका छन्।
उनका व्यवस्थापक रमन शिवाकोटीका अनुसार सन्दिप अहिले (मंगलबार दिउँसो) अमेरिकी दूतावासमै छन्।क्यारेबियन प्रिमियर लिग २०१९ खेल्न अमेरिका जानका लागि सन्दीपले अमेरिकी दूतावासमा भिसा अप्लाई गरेका थिए । तर, भिसा अस्वीकृत भएपछि आफू अचम्ममा परेको सन्दीपले ट्विटरमार्फत जानकारी दिएका थिए । आवश्यक सबै कागजातहरु पेश गर्दा पनि भिसा अस्वीकृत भएको उनले उल्लेख गरेका छन् ।
सन्दीपले ट्विटरमा प्रधानमन्त्री केपी शर्मा ओली र परराष्ट्रमन्त्री प्रदीप ज्ञवालीलाई पनि मेन्सन गरेका थिए। उनले अमेरिकी राजदूत र दूतावासलाई पनि ट्विटमा मेन्सन गरेका थिए।
