तितोपाटी – राजधानीको घट्टेकुलो र सुकेधारामा बिस्फोट हुँदा तीन जनाको मृत्यु भएको छ भने ७ जना घाइते छन्। सोमबारका लागि नेत्रविक्रम चन्द समूहले आह्ववान गरेको बन्द कार्यक्रममा विस्फोट गराउन तयार पारिँदै गरेको सिलिन्डर बम पड्किएको हो।
आइतबार अपराह्न अनामनगरस्थित घट्टेकुलाको एक घरको कोठामा बिस्फोट हुँदा १ जना र सुकेधाराको ढलाने पुलस्थित सैलुनमा भएको बिस्फोटमा परी २ जनाको मृत्यु भएको नेपाल प्रहरीका प्रवक्ता डिआईजी विश्वराज पोखरेलले जानकारी दिए। उनका अनुसार मृतककाे सनाखत हुन सकेकाे छैन्।
अनामनगरमा ६ जना र सुकेधारामा ४ जना घाइते भएकाे र उनीहरूकाे ओम अस्पतालमा उपचार भइरहेकाे प्रवक्ता पाेखरेलले बताए।
अनामनगरमा घरको कोठाभित्र बिस्फोट भएको थियो। अहिले घटनास्थललाई सुरक्षाकर्मीले नियन्त्रणमा लिएको छ। घटनाबारे प्रहरीले अनुसन्धान सुरू गरेकाे छ। स्थानीयका अनुसार ठूलो आवाजको विस्फोटका कारण नजिकैका घरका सिसासमेत फुटेको छ।
