तीतोपाटी-भारतीय प्रधानमन्त्री नरेन्द्र मोदीका दूत तथा उत्तर प्रदेशका मुख्यमन्त्री योगी आदित्यनाथ निजी बिमानमा २६ मंसिरमा जन्ती लिएर जनकपुर उत्रिने भएका छन् ।
प्रदेश सरकारले रामजानकी विवाह महोत्सवको तयारी जारी राखेको छ । उक्त महोत्सवमा आदित्यनाथ आउनुको साथै रंगभुमी मैदानमा हुने स्वयंवर कार्यक्रममा सहभागी हुनेछन् । सम्बोधन पनि हुनेछ ।
महोत्सवलाई प्रभावकारी बनाउन प्रदेश २ का मुख्यमन्त्री लालबाबु राउतसहित मन्त्रीहरू जितेन्द्र सोनल, मेयर लालकिशोर साहलगायतले तयारीलाई तिव्रता दिएका छन् ।
योगी आदित्यनाथको सुरक्षाका लागि प्रदेश प्रहरी प्रमुख डीआईजी हरिबहादुर पाल, धनुषाका प्रमुख जिल्ला अधिकारी, नेपाल प्रहरी र सशस्त्र प्रहरीका प्रहरी उपरीक्षकहरु सक्रिय छन् ।
आदित्यनाथले जनकपुरधाममा पुजा गर्नेछन् । त्यसपछि उनी मधेश भवनमा आयोजन हुने सम्मान कार्यक्रममा सहभागी हुने जनाइएको छ ।
मधेश भवनमा मुख्यमन्त्री लालबाबु राउतले उत्तरप्रदेशका मुख्यमन्त्री योगीको सम्मानमा दिवा भोज दिनेछन् ।
