तीतोपाटी- सुदूरपश्चिम प्रदेशको सामाजिक विकासमन्त्रीमा कृष्णराज सुवेदी नियुक्त भएका छन् ।
मंगलबार सामाजिक विकासमन्त्री दीर्घ सोडारीलाई बर्खास्त गरि सुवेदीलाई नियुक्त गरिएको हो । नवनियुक्त मन्त्री सुवेदीले मंगलबार नै पद तथा तथा गोपनियताको सपथ लिएका छन् ।
सुदूरपश्चिम प्रदेश प्रमुख मोहनराज मल्लको उपस्थितिमा मुख्यमन्त्री त्रिलोचन भट्टले सुवेदीलाई सपथ गराएका हुन् ।
सोडारीलाई पदीय मर्यादा अनुसार काम गर्न नसकेको भन्दै नेकपाकाले फिर्ता बोलाएको थियो । सोडारी र सुवेदी दुवै जना तत्कालीन एमालेको तर्फबाट निर्वाचित सांसद हुन् ।
सोडारी कैलाली क्षेत्र नम्बर ४ ‘क’बाट निर्वाचित प्रदेशसभा सदस्य हुन् भने सुवेदी सोही क्षत्रेको ‘ख’बाट निर्वाचित प्रदेशसभा सदस्य हुन् ।
सुवेदी तत्कालीन एमालेका कैलाली जिल्ला सचिवालय सदस्य हुन भने सोडारी अध्यक्ष हुन् । पार्टीभित्र सोडारी र सुवेदी दुवैजना माधव नेपाल पक्षका मानिन्छन् ।
यता बर्खास्तीमा परेका निवर्तमान मन्त्री सोडारीले आफू गुटबन्दीको शिकार भएको बताए । उनले पार्टीबाटै निर्वाचन जितेर मन्त्री भएकाले पार्टी फिर्ता बोलाउँदा अन्यथा भने नलिएको बताए । नयाँ मन्त्रीलाई प्रदेशसभा सदस्यका हिसाबले पूर्ण सहयोग गर्ने उनले बताए ।
