कुवेतको हावली गभर्नरेट सुरक्षा निर्देशनालयले कुवेत नगरपालिका र सार्वजनिक खाद्य तथा पोषण प्राधिकरणसँगको सहकार्यमा व्यापक सुरक्षा अभियान सञ्चालन गरेको छ। अभियानको उद्देश्य सुरक्षा उपस्थिति मजबुत बनाउने, फरार तथा कानुन उल्लंघन गर्ने व्यक्तिलाई पक्राउ गर्ने र कानुन कार्यान्वयनलाई प्रभावकारी बनाउनु रहेको जनाइएको छ।
अभियानका क्रममा १२२ जना वान्टेड तथा कानुन उल्लंघनकर्तालाई पक्राउ गरिएको छ। सुरक्षाकर्मीले निकास क्षेत्र, चेकपोस्ट तथा स्थायी सुरक्षा पोस्टसहित १९५ वटा सुरक्षा तैनाथी सञ्चालन गरेका थिए।
त्यसैगरी, ५४७ ट्राफिक उल्लंघन दर्ज गरिएको, वान्टेड रहेका ५ वटा सवारीसाधन नियन्त्रणमा लिइएको तथा नियम उल्लंघन गर्ने ६२ वटा सवारीसाधनलाई चेतावनी र हटाउने सूचना जारी गरिएको छ। साथै, परित्यक्त सवारीसाधन, ट्रेलर, कारभान, बस, मोटरसाइकल, दीवानिया तथा बाहिरी बारलगायत ४४ वटा संरचना/साधन हटाइएको छ।
अभियानका क्रममा ३४ वटा मानवीय सहायता सेवा प्रदान गरिएको, बन्द स्थानमा धूम्रपानसम्बन्धी ७ वटा उल्लंघन फेला परेको तथा कुवेत नगरपालिकाले ४४ वटा उल्लंघन तथा प्रतिवेदन दर्ता गरेको छ।
सार्वजनिक खाद्य तथा पोषण प्राधिकरणले १४ वटा उल्लंघन दर्ज गर्नुका साथै मिसावट गरिएको १२ किलो खाद्य पदार्थ नष्ट गरेको जनाएको छ। सम्बन्धित निकायका अनुसार अभियानबाट कुल १,०७४ वटा कारबाही/उल्लंघनसम्बन्धी परिणाम प्राप्त भएका छन्। पक्राउ परेका व्यक्ति तथा उल्लंघनकर्तामाथि सम्बन्धित निकायको अधिकारक्षेत्रअनुसार आवश्यक कानुनी कारबाही अघि बढाइने जनाइएको छ।
