इजरायली प्रधानमन्त्री बेन्जामिन नेतान्याहुले दक्षिणी लेबनानमा तैनाथ इजरायली सैनिकहरूको भ्रमणका क्रममा इजरायल र लेबनानले एकअर्कालाई सार्वभौम राष्ट्रका रूपमा स्वीकार गरेको बताएका छन्। उनले दुवै देश शान्तिपूर्ण सहअस्तित्व चाहने सार्वभौम राष्ट्र भएको उल्लेख गर्दै सीमाक्षेत्रमा स्थायित्व र सुरक्षा कायम गर्नुपर्ने आवश्यकता औंल्याए।
भ्रमणका क्रममा नेतान्याहुले हिजबुल्लाह र त्यसका प्रमुख समर्थक इरानलाई लक्षित गर्दै कडा सन्देश दिएका छन्। उनले भने, “यो स्थान छाडिदिनुहोस्, अब तपाईंहरूको यहाँ कुनै स्थान छैन। यहाँ शान्तिपूर्वक बाँच्न चाहने दुई सार्वभौम राष्ट्र छन्।” उनले हिजबुल्लाहको सैन्य उपस्थिति र इरानी प्रभावले क्षेत्रीय स्थायित्वमा बाधा पुर्याएको आरोप लगाउँदै इजरायल आफ्नो सुरक्षा सुनिश्चित गर्न आवश्यक सबै कदम चाल्न तयार रहेको बताए।
हालै इजरायल, लेबनान र अमेरिकी मध्यस्थतामा भएको नयाँ सुरक्षा व्यवस्थापछि नेतान्याहुको यो भ्रमणलाई महत्त्वपूर्ण सन्देशका रूपमा हेरिएको छ। यद्यपि हिजबुल्लाहले इजरायली दाबीलाई अस्वीकार गर्दै आफू लेबनानको रक्षा गर्न प्रतिबद्ध रहेको जनाएको छ। यसबीच अन्तर्राष्ट्रिय समुदायले दुवै पक्षलाई तनाव थप नबढाउन र दीर्घकालीन शान्तिका लागि कूटनीतिक प्रयासलाई निरन्तरता दिन आग्रह गरिरहेको छ।
