तितोपाटी – जाडोयामका लागि बढी उपयोगी यो मसाजमा, हर्बल ओयलले मालिस गरी, हट स्टोनले सेकेर फेरि मालिस गरिन्छ । एकपटकको मालिस पछि शरीरको पछाडीपट्टिको भागमा जोइन्ट–पोइन्ट पत्ता लगाएर त्यही स्थानमा तातो ढुंगा राखी केही समय सेकिसकेपछि त्यसलाई झिकेर पुन मालिस गरिन्छ ।
हटस्टोन मसाजका फाइदा के–कस्ता छन् ?
प्राकृतिक पद्धतिद्वारा गरिने हट स्टोन मसाजले शरीरलाई मात्र नभएर मस्तिष्क र आत्मालाई समेत तरोताजा र स्फुर्त राख्न सहयोग पुर्याउँछ । यसले शरीरको रक्तसंचार बढाउने, तनाव, थकान, अनिद्रा हटाउने, दिमाग र शरीर दुवैलाई चंगा बनाउने काम गर्छ ।
कस्ता व्यक्तिहरूले हट स्टोन मसाज लिनुहुँदैन ?
ज्वरो आएका, छालाको एलर्जी भएका, गर्मी जिउका, भर्खरै अपरेसन गरेका, गर्भवती आदिले यो नगर्दा नै बेस हुन्छ ।
के–कस्ता समस्याका लागि यो उत्तम मसाज हो ?
विशेषत: चिसोले संक्रमण गर्ने शरीर भएका मानिसहरूका लागि फाइदाजनक हुन्छ । त्यसबाहेक दम, बाथ, जोर्नी दुख्ने र करकर खाने समस्या भएकाहरूका लागि यो मसाज अत्यन्तै उपयोगी छ ।
