तीतोपाटी- आफुले १८ घन्टा परदेशमा खटिएर पसिना बगाएर कमाएको पैसा निरन्तर परोपकारमा खर्च गरिरहेका समाजसेवी हेम थापा (अमेरिका) दम्पतीले पुनः अर्को सहयोग गरेका छन ।
थापा दम्पत्तीले सोमबार आर्थिक अवस्था निकै कमजोर भएकी रोल्पा जितवाङ-७ स्थाई घर भइ हाल दाङको घोराई उ.म.न.पा-७ बस्दै आएकी ८ कक्षामा अध्ययनरत १५ बर्षीया नारायणी घर्तीको उपचारको लागि पचास हजार नेपाली रूपैयाँ (५०,०००/-) सहयोग गरेको समाजसेवी हेम थापाले बताए । पीडित बालिकाका बुबा भुपेन्द्र प्रकाशका अनुसार नारायणीलाई हातमा क्यान्सर भएकोछ । हाल अमेरिका निवासी समाजसेवी हेम थापा दम्पत्तीको स्थाई घर तेह्रथुम जिल्ला मोराहाङ गाबिस ९ सिकिदेम हो ।
स्मरण रहोस समाजसेवामा करोड भन्दा बढी खर्च गरिसकेका यी दम्पतीले साउदीमा फसेका प्रेम राई बचाउन ५ लाख र कुमार राना बचाउन २ लाख आफ्नै खल्तीको पैसा खर्च गरेका थिए । आजसम्म जति पनि सहयोग गरे आफ्नै पसिनाको कमाईको पैसा खर्च गरिरहेको थापा दम्पत्ती बताउँछन ।
