१)संझना आउँछ
ती भिरपाखाको
बयली खेलेको
तीजमा बरीलै
नाचेर गाएको
दर नि खाएको ।
२)
आँगन डिलमा
रानीचरी नाची
कम्मरै भाँचेर
मन भित्र साँची
दाजु लिन आए
माइत नि गएँ ।
३)चेलीको वेदना
पोखेर तीजमा
यो मनको बह
नबनाऊँ चेली
त्यो आँसुको दह
दुख पीडा बेली ।
४) अँगाल संस्कार
फ्याक अहंकार
सपना मनको
पार्नुछ साकार
हामी चेली सब
किन ढिला अब ।
५) पतिदेव भनी
व्रत बस्छौ हामी
सम्मान गरेर
उज्यालो छरेर
रही सौम्य शान्त
सम्बन्ध अनन्त ।
६)संझौ हामी सधै
सासू आफ्नै आमा
ससुरा हुन् बाबा
नन्द आफ्नै बैनी
देवर नि भाइ
जेठाजू हो दाइ ।
७)मनाऊ है तीज
खाइ चिजबिज
बाहिर नजाऊ
भित्र नै रमाऊ
यो वर्षको तीज
प्रविधिको बिच
८) चेलीबेटी हामी
रहेछौ है दामी
परिस्थिति बुझ्ने
आँसुमा रुझे नि
मुस्कानले पुज्ने
मन भाव बुझ्ने ।
९)माइत जाने हो
श्रीफूल लाएर
रातो सारी चोली
कस्तो मीठो बोली
कम्मर भाँचेर
गाएर नाचेर ।
१०) तीजको बेलामा
जान्न म मेलामा
दाजु नि आएनन्
मन दुख्यो साह्रै
घर बस्दा गाह्रै
,संझीए आमाबा ।
११)कोरोना हटेसी
माइत आँउला
तीजको भाग नि
राखिदिनु आमा
संम्झी बसी हौली
आँगन कुरेर ।
१२) सस्कृती बचाँउ
तडकभडक
हटाएर हामी
माइती घरको
त्यो स्वच्छ भावना
छ शुभकामना ।
सीता बिष्ट कार्की (सीबिका)
काठमाण्डौ
