तितोपाटी- पछिल्लो समय भिजिट भिसामा रोजगारीका लागि नेपाली कामदार युएई पठाइने क्रम बढेको छ । आइतबार बिहानको भिजिट भिसामा १ सय ५७ जना नेपाली कामदार जजिरा एयरलाइन्समार्फत कुवेत हुँदै युएई पठाउन लागिएको सूचना पाएको वैदेशिक रोजगार विभागका एक जना कर्मचारीले जानकारी दिएका छन् ।
म्यानपावर, कन्सल्टेन्सी, ट्राभल र एजेन्टबाट भिजिट भिसामा कामदारलाई जजिरा एयरलाइन्समार्फत यूएई पठाउन लागेको सूचना विभागमा आएको ती कर्मचारीले बताए । भिजिट भिसामा फ्लाइ दुबई र एयर अरबियामार्फत जानेलाई कडाइ गरेपछि एजेन्टले उडान परिवर्तन गरेर जजिरा एयरलाइन्समार्फत पठाउन लागेको उनको भनाइ छ ।
१ सय ५७ जनामध्ये ७ जना महिला रहेको सूचना पाएको ती कर्मचारीले बताए । जजिराको बिहान १० बजेको उडानमा कुवेत हुँदै युएईका लागि टिकट भएको सूचना पाएको विभागले जनाएको छ । यसरी भिजिट भिसामा गएकामध्ये अधिकांश घुम्नका लागि नभएर काम गर्नका लागि त्यहाँ गएका विभिन्न अध्ययनले देखाएका छन् ।
भिजिट भिसा नाममा म्यानपावर कम्पनी, कन्सल्टेन्सी र व्यक्तिगत एजेन्टले चर्को रकम लिएर रोजगारीका लागि कामदार पठाउने गरेका छन् । यसरी जाने कतिपय नेपालीलाई कहाँ र कसरी जाँदै छौँ भनेर गन्तव्यका बारमा थाहा नपाउने गरेको वैदेशिक रोजगार विभागले जानकारी दिएको छ ।
नेपालबाट यसरी भिजिट भिसामा उडेका महिलालाई यूएईसँगै खाडीका अन्य देशमा घरेलु कामदारका रूपमा पुर्याउने गरिएको छ । सरकारले खाडीका देश र मलेसियामा महिला घरेलु कामदार पठाउन प्रतिबन्ध लगाएपछि यी देशमा म्यानपावर कम्पनीहरूले भिजिट भिसामार्फत कामदार पठाउने गरेका छन् ।
काेरोना महामारीका कारण बन्द भएको अन्तर्राष्ट्रिय हवाई सेवा सञ्चालनमा आएयता साढे १० हजार नेपाली भिजिट भिसामा यूएई पुगेका छन् । अध्यागमन विभागको तथ्यांकअनुसार गत १६ भदौदेखि अन्तर्राष्ट्रिय हवाई सेवा सञ्चालनमा आएपछि १० हजार ५ सय नेपाली भिजिट भिसामा यूएई गएका छन् ।
-साभार शिलापत्रबाट
