तितोपाटी – राष्ट्रपति विद्यादेवी भण्डारीबाट संविधानसभाबाट संविधान निर्माणमा भूमिका खेल्ने तत्कालीन सभासद तथा सम्बन्धित पूर्व विशिष्ट व्यक्तित्वहरूलाइ ‘संविधानसभा पदक’ वितरण गरिएको छ। आज शीतल निवासमा आयोजित विशेष समारोहमा तत्कालीन पहिलो र दोस्रो संविधानसभाका निर्वाचित तथा समानुपातिक सभासदलगायतलाई साे पदक प्रदान गरिएको हाे । यसरी पदकसहित सम्मानित हुनेहरुमा राष्ट्रपति भण्डारी स्वयं पनि रहेकी छन् ।
बहालवाला प्रधानमन्त्री केपी शर्मा ओली तथा पूर्वप्रधानमन्त्रीहरु गिरिजाप्रसाद कोइराला, पुष्पकमल दाहाल प्रचण्ड, सुशील कोइराला, शेरबहादुर देउवा, झलनाथ खनाल, माधवकुमार नेपाल, डा. बाबुराम भट्टराई, सूर्यबहादुर थापालगायतलाई पनि साे पदक प्रदान गरिएकाे छ ।
यसैगरी बहालवाला सभामुख कृष्णबहादुर महरालगायत पूर्व सभामुख सुवास नेम्वाङ, ओनसरी घर्तीमगरलाई समेत साे पदक प्रदान गरिएकाे छ ।
पदक वितरणका लागि गृह मन्त्रालयले १ हजार १ सय ९ जनाको नामावली सार्वजनिक गरेको थियो । त्यसमा सरकारद्वारा प्रतिबन्धित नेत्रविक्रम चन्द विप्लव नेतृत्वकाे नेकपाका स्थायी समिति सदस्य खड्कबहादुर विश्वकर्मासहित तीनजना नेताकाे नाम समेत रहेकाे छ ।
तर कतिपय गम्भीर अभियाेग लागेका पूर्वसभासदहरुले भने पदक नपाउने भएका छन्, कूटनीतिक राहदानी दुरुपयाेगलगायतका गम्भीर आराेप लागेका गायत्री साह र विश्वनाथप्रसाद यादव लगायतका पूर्पसभासदकाे नाम सूचीमा छैन । यद्यपि पदक पाउनेको सूचीमा भ्रष्टाचारको मुद्दा लागेका पूर्वमन्त्रीद्वय टेकप्रसाद गुरुङ र बद्री न्यौपाने पनि रहेका छन् ।
समाराेहमा सबै उपस्थित नभए पनि अधिकांश पूर्वसभासदहरु भने उपस्थित छन् । बिहानैदेखि सुरु भएकाे पदक वितरण समाराेह साँझ ५ बजेसम्म चल्ने राष्ट्रपति कार्यालयले जनाएको छ । अहिले पदक थाप्नेहरुकाे शीतल निवासमा घुइँचाे लागेकाे छ ।
