नेपालका लागि चिनियाँ राजदूत चाङ माओमिङसहित सात सदस्यीय टोली कोरला नाका हुँदै उपल्लो मुस्ताङको लोमान्थाङ पुगेको छ। पाँच जना चिनियाँ अधिकारी र नेपालस्थित चिनियाँ दूतावासका दुई प्रतिनिधि रहेको टोली शनिबार कोरला नाका पार गर्दै नेपाल प्रवेश गरेको हो। राजदूतसहितको टोलीले कोरला नाका तथा मुस्ताङ भन्सार क्षेत्रको स्थलगत अवलोकन गरेको छ।
समुद्री सतहबाट करिब ४ हजार ६५० मिटर उचाइमा रहेको कोरला नाका हुँदै टोली लोमान्थाङ पुगेको हो। मुस्ताङका प्रमुख जिल्ला अधिकारी अजिता शर्माका अनुसार भ्रमणको विस्तृत उद्देश्यबारे प्रशासनलाई औपचारिक जानकारी प्राप्त नभए पनि चिनियाँ राजदूतले जिल्लाका अधिकारीहरूसँग भेटघाट गर्ने कार्यक्रम रहेको छ। टोलीको सुरक्षाका लागि स्थानीय प्रहरीले आवश्यक व्यवस्था मिलाएको छ।
राजदूत माओमिङको भ्रमणलाई विशेषगरी कोरला नाकाको वर्तमान अवस्था, पूर्वाधार र पूर्ण सञ्चालनको सम्भावनासँग जोडेर हेरिएको छ। रसुवागढी–केरुङ र तातोपानी नाका प्रभावित भइरहेका बेला उत्तरी व्यापारका लागि कोरला नाकाको महत्व बढेको छ। चिनियाँ राजदूत स्वयं नाका हुँदै मुस्ताङ पुगेर स्थलगत अवस्था बुझ्नुलाई यसै सन्दर्भमा अर्थपूर्ण मानिएको छ।
टोलीले लोमान्थाङबाट जोमसोम पुगेर नेपाली तथा चिनियाँ अधिकारीहरूसँग कोरला नाकाको सञ्चालन, सीमा क्षेत्रका समस्या र व्यापारिक गतिविधिबारे छलफल गर्ने कार्यक्रम रहेको जनाइएको छ। त्यसपछि राजदूतसहितको टोली पुनः लोमान्थाङ फर्किएर कोरला नाका हुँदै चीनतर्फ जाने कार्यतालिका रहेको छ।
कोरला नाका नेपाल–चीन व्यापारका दृष्टिले मात्र नभई उत्तर–दक्षिण व्यापारिक सम्पर्कको महत्वपूर्ण मार्गका रूपमा समेत हेरिँदै आएको छ। कोरला क्षेत्रलाई कालीगण्डकी करिडोरमार्फत नेपालको दक्षिणी सीमासम्म जोड्ने सडक सञ्जालले चीन र भारतबीचको छोटो स्थलमार्गीय सम्पर्कको सम्भावना बोकेको छ। त्यसैले नाकाको पूर्वाधार र नियमित सञ्चालनले मुस्ताङसहित मध्यनेपालको व्यापारिक गतिविधिमा प्रभाव पार्न सक्ने अपेक्षा गरिएको छ।
यसअघि लामो समय सीमित आवागमनमा रहेको कोरला नाका पछिल्लो समय चिनियाँ प्राथमिकतामा पर्दै आएको छ। अहिले उत्तरी अन्य नाकाहरू प्रभावित रहेको अवस्थामा चिनियाँ राजदूतकै नेतृत्वमा उच्चस्तरीय टोलीले कोरला नाका हुँदै स्थलगत भ्रमण गर्नुले नाका व्यवस्थित र थप प्रभावकारी रूपमा सञ्चालन गर्ने विषयमा द्विपक्षीय चासो बढेको संकेत गरेको छ। यद्यपि, भ्रमणबाट कुनै नयाँ औपचारिक निर्णय भएको पुष्टि भने हालसम्म भएको छैन।
