किएभ, अक्टोबर ४ — जर्मन चान्सलर फ्रेडरिक मर्ज युक्रेनको राजधानी किएभमा समर्थन जनाउन पुगेकै दिन रुसी ड्रोनले शहरको महत्वपूर्ण नर्दर्न ब्रिजमा प्रहार गरेको छ।
युक्रेनी अधिकारीहरूका अनुसार आइतबार बिहान किएभमा हवाई आक्रमणको चेतावनीका साइरन बजिरहेका बेला रुसी ड्रोनले डिनिप्रो नदीमाथिको पुलको सडक भागमा प्रहार गरेको हो। घटनाका कारण पुलमा आवागमन प्रभावित भएको छ। पछिल्ला दिनमा किएभका प्रमुख पुलहरू लगातार रुसी आक्रमणको निशानामा परेका छन्।
आक्रमणको समयमा मर्ज युक्रेनी राष्ट्रपति भोलोदिमिर जेलेन्स्कीसँग किएभमा भेटवार्ता गरिरहेका थिए। मर्जले युक्रेनलाई जर्मनीको समर्थन निरन्तर रहने बताउँदै रूसलाई रोक्न नसकिए उसको युद्ध क्षमता भविष्यमा युरोपतर्फ पनि लक्षित हुन सक्ने चेतावनी दिएका छन्।
जेलेन्स्कीले मर्जलाई हालै रुसी आक्रमणबाट क्षतिग्रस्त युक्रेनी राष्ट्रिय विज्ञान प्रतिष्ठानको भवन पनि देखाएका थिए। दुवै नेताले युद्धमा मारिएका युक्रेनी सैनिकहरूको स्मारकमा पुगेर श्रद्धाञ्जलीसमेत दिएका छन्।
जर्मनीबाट थप सैन्य सहयोगको तयारी
मर्जको भ्रमणका क्रममा जर्मनीले युक्रेनका लागि एक अर्ब युरोभन्दा बढीको थप सैन्य सहयोग घोषणा गर्ने तयारी गरेको बताइएको छ। ऊर्जा क्षेत्रको पुनःस्थापनाका लागि पनि करिब ३५० मिलियन युरो सहयोगको योजना रहेको अन्तर्राष्ट्रिय सञ्चारमाध्यमहरूले जनाएका छन्।
यससँगै जर्मनी र युक्रेनबीच ड्रोन उत्पादन तथा रुसी ड्रोन रोक्ने प्रतिरोधी प्रविधिमा सहकार्य विस्तार गर्ने विषय पनि छलफलमा रहेको छ।
युक्रेनी पक्षका अनुसार पछिल्लो आक्रमणमा किएभसहित विभिन्न क्षेत्रमा १३५ वटा रुसी आक्रमणकारी ड्रोन प्रयोग गरिएको थियो, जसमध्ये ५० भन्दा बढी जेट इन्जिनयुक्त ड्रोन रहेको दाबी गरिएको छ।
