इजिप्टको कायरोस्थित फौजदारी अदालतले चर्चित टेलिभिजन प्रस्तोता तथा निर्माता सारा खलिफासहित १२ जनालाई मृत्युदण्ड सुनाएको छ। उनीहरूलाई लागुऔषध उत्पादन तथा तस्करीका लागि संगठित आपराधिक समूह सञ्चालन गरेको अभियोगमा दोषी ठहर गरिएको हो।
३९ वर्षीया सारा खलिफा ‘Mission Impossible’ नामक सुरक्षा तथा अपराधसम्बन्धी टेलिभिजन कार्यक्रम सञ्चालन गरेपछि चर्चामा आएकी थिइन्। उनी टेलिभिजन कार्यक्रमबाहेक सौन्दर्यसम्बन्धी क्लिनिक र कार्यक्रम उत्पादन कम्पनीसँग पनि आबद्ध रहेको बताइएको छ। 
अदालतका अनुसार खलिफासहितका अभियुक्तहरूले विदेशबाट सिन्थेटिक लागुऔषध उत्पादनमा प्रयोग हुने सामग्री ल्याएर त्यसबाट लागुऔषध उत्पादन तथा बिक्री–वितरण गर्ने सञ्जाल सञ्चालन गरेका थिए। उनीहरूमाथि अनुमतिबिनाका हतियार तथा गोली राखेको आरोपसमेत लगाइएको थियो।
अनुसन्धानका क्रममा प्रहरीले ७५० किलोग्रामभन्दा बढी लागुऔषध तथा त्यसका कच्चा पदार्थ बरामद गरेको र लागुऔषध उत्पादनका लागि प्रयोग गरिएका दुईवटा गोप्य प्रयोगशाला फेला पारेको विवरण सार्वजनिक भएको छ।
यो मुद्दामा कुल २८ जना अभियुक्त थिए। अदालतले १२ जनालाई मृत्युदण्ड सुनाउँदा अन्य ९ जनालाई आजीवन कारावास र ७ जनालाई सफाइ दिएको छ। मृत्युदण्डसम्बन्धी फैसला सुनाउनुअघि इजिप्टको कानुनी प्रक्रियाअनुसार ग्रान्ड मुफ्तीको रायसमेत लिइएको थियो।
खलिफाले आफूमाथिको आरोप अस्वीकार गर्दै आफू लागुऔषध कारोबारमा संलग्न नभएको दाबी गर्दै आएकी छन्। सञ्चारमाध्यमका अनुसार उनले प्रहरी अनुसन्धानका क्रममा लागुऔषध देखेको दाबीसमेत अस्वीकार गरेकी थिइन्।
अदालतको फैसला अन्तिम भने होइन। मृत्युदण्ड पाएका अभियुक्तहरूलाई कानुनी रूपमा पुनरावेदन गर्ने अधिकार रहेको छ। त्यसैले हाललाई यो अदालतको फैसला मात्र हो र अपिल प्रक्रियापछि यसको अन्तिम अवस्था निर्धारण हुनेछ।
