इरानी राष्ट्रपति मसुद पेजेस्कियानका छोरा युसेफ पेजेस्कियानले इरानको अस्तित्व युरेनियम संवर्धनमा निर्भर नरहेको बताएका छन्। उनले युरेनियम संवर्धन जारी राख्ने वा नराख्ने निर्णय गर्नुअघि त्यसबाट हुने फाइदा र लागत दुवैलाई गम्भीर रूपमा मूल्यांकन गर्नुपर्ने धारणा व्यक्त गरेका छन्।
इन्स्टाग्राम स्टोरीमार्फत उनले भनेका छन्, “हाम्रो अस्तित्व संवर्धनमा निर्भर छैन। हामीले युरेनियम संवर्धन नगरे पनि मर्ने छैनौँ।” यद्यपि आफू संवर्धनको विपक्षमा नरहेको स्पष्ट पार्दै उनले यस विषयमा इरानको सर्वोच्च राष्ट्रिय सुरक्षा परिषद् र सर्वोच्च नेताले गर्ने निर्णय आफूले स्वीकार गर्ने बताएका छन्।
उनका अनुसार मुख्य कुरा संवर्धन गर्ने वा नगर्नेभन्दा पनि त्यसबाट उत्पन्न हुन सक्ने परिणामबारे पूर्ण जानकारीसहित निर्णय लिनु हो। “तर्कसंगत व्यक्तिले कुनै निर्णय गर्नुअघि त्यसको लागत र फाइदा तौलिन्छ,” उनले उल्लेख गरेका छन्।
युसेफले इरानको आणविक ऊर्जा कार्यक्रमका लागि स्वदेशमै युरेनियम संवर्धन अनिवार्य नभएको तर्कसमेत गरेका छन्। उनले बुसेहर आणविक ऊर्जा केन्द्रमा प्रयोग हुने आणविक इन्धन अहिले पनि रुसबाट आयात हुने उदाहरण दिँदै भनेका छन्, “आज पनि बुसेहर आणविक ऊर्जा केन्द्रको इन्धन हामी आफैँ उत्पादन गर्दैनौँ, रुसबाट आयात गर्छौँ।”
उनको यो अभिव्यक्ति इरानको आणविक कार्यक्रम र युरेनियम संवर्धनलाई लिएर अन्तर्राष्ट्रिय तनाव कायम रहेका बेला आएको हो। राष्ट्रपतिका छोराको यो धारणा इरानको आधिकारिक नीति परिवर्तनको घोषणा भने होइन, तर संवेदनशील आणविक विषयमा इरानी नेतृत्वभित्र लागत–लाभको पुनर्मूल्यांकनबारे सार्वजनिक रूपमा आएको महत्वपूर्ण टिप्पणीका रूपमा हेरिएको छ।
