कुवेतको सल्मी क्षेत्रमा रहेको एक पशुशालामा साउदी नागरिकको हत्या तथा त्यसपछि आगजनी गरेको आरोपमा एक बंगलादेशी नागरिक पक्राउ परेका छन्।
आन्तरिक मन्त्रालयअन्तर्गतको क्रिमिनल सेक्युरिटी सेक्टर तथा जनरल डिपार्टमेन्ट अफ क्रिमिनल इन्भेस्टिगेसनको जाहरा अनुसन्धान विभागले घटनाको अनुसन्धान गर्दै हत्या र आगजनीको रहस्य पत्ता लगाएको हो। सुरुमा पशुशालामा आगलागी भएको र एक व्यक्ति मृत अवस्थामा फेला परेको सूचना पाएपछि प्रहरीले घटनास्थलमा अनुसन्धान सुरु गरेको थियो।
अनुसन्धानका क्रममा प्रहरीले आगोले जलेको अवस्थामा पीडितको शव फेला पारेको थियो। साथै पीडितको सवारीसाधनभित्र रगतका दागसमेत भेटिएपछि घटना सामान्य आगलागी नभई आगलागी हुनुअघि नै हत्या भएको हुन सक्ने आशंका गरिएको थियो।
अनुसन्धान अगाडि बढाउँदै जाँदा प्रहरीले उक्त पशुशालाका सुरक्षा गार्डलाई नियन्त्रणमा लिएको थियो। प्रारम्भिक सोधपुछका क्रममा ती बंगलादेशी नागरिकले विवादपछि पीडितमाथि काठको लठ्ठीले प्रहार गरेको स्वीकार गरेको बताइएको छ।
आरोपीका अनुसार आक्रमणपछि उनले पीडितलाई पशुचारा भण्डारण गर्ने स्थानमा लगेका थिए। त्यसपछि हत्या लुकाउने उद्देश्यले उक्त स्थानमा आगो लगाएको र घटनास्थल तथा सवारीसाधनमा रहेका रगतका दाग हटाउने प्रयास गरेको अनुसन्धानबाट खुलेको छ।
उनले पीडितका केही सामानसमेत हटाएर घटनाको प्रमाण नष्ट गर्ने प्रयास गरेको प्रहरीले जनाएको छ।
पक्राउ परेका अभियुक्तलाई आवश्यक कानुनी कारबाहीका लागि सम्बन्धित निकायमा बुझाइएको छ। घटनाबारे थप अनुसन्धान भइरहेको कुवेती अधिकारीहरूले जनाएका छन्।
