इरानका राष्ट्रपति इब्राहिम रायसीको हेलिकप्टर दुर्घटनामा मृत्यु भएको छ ।
उनीसँगै विदेशमन्त्री होसेन अमिर अब्दुल्लाहियानको पनि ज्यान गएको छ । इरानी उच्च अधिकारीलाई उद्धृत गर्दै समाचार संस्था रोयटर्सले राष्ट्रपति रायसी र विदेशमन्त्री अब्दुल्लाहियानको मृत्यु भएको पुष्टि गरेको हो । उनीहरु सवार हेलिकोप्टर आइतबार दुर्घटनामा परेको थियो ।
हेलिकोप्टर सम्पर्कविहीन भएको करिब १५ घण्टापछि दुर्घटनाग्रस्त अवस्थामा सोमबार बिहान भेटिएको इरानी सञ्चार माध्यमले जनाएका छन् । अजरबैजानको सीमा क्षेत्र जोल्फा नजिकै पूर्ण रुपमा जलेको अवस्थामा हेलिकोप्टर भेटिएको अधिकारीहरुले बताएका छन् ।
राष्ट्रपति र विदेशमन्त्री सवार हेलिकप्टर सम्पर्कविहीन भएपछि २० भन्दा बढी होलिकोप्टर खोजीमा खटाइएको थियो ।
टर्कीबाट गएको ड्रोनले हेलिकप्टरको दुर्घटनास्थल पत्ता लगाएको थियो ।
