रुसको दक्षिणी भागमा रहेको एउटा पेट्रोल स्टेशनमा भएको विस्फोटमा परी कम्तीमा ३५ जनाको मृत्यु भएको छ भने दर्जनौं घाइते भएका छन् । स्थानीय समय अनुसार सोमबार राती ९ः४० मा क्यास्पियन सागरको तटमा रहेको दागेस्तानको क्षेत्रीय राजधानी मखाचकलामा विस्फोट भएको बीबीसीमा समाचार छ ।
रुसका राष्ट्रपति भ्लादिमिर पुटिनले उक्त विष्फोटपछि गहिरो समवेदना प्रकट गरेका छन् ।
स्थानीय सञ्चारमाध्यमका अनुसार पेट्रोल स्टेशन नजिकै रहेको कार मर्मत केन्द्रमा आगलागी भएको हो । विष्फोट लगत्तै दागेस्तानको कुमतोरकालिन्स्की जिल्लामा आपतकालिन अवस्था शुरू गरिएको थियो। आपतकालीन मन्त्रालयका अनुसार करिब २६० जना आपतकालीन कामदारहरू तैनाथ गरिएको छ भने सबैभन्दा गम्भीर घाइतेहरूलाई हवाई मार्गबाट मस्को लगिएको छ।
रुसको इन्टरफ्याक्स समाचार एजेन्सीले चिकित्सकहरूलाई उद्धृत गर्दै मृतकमध्ये तीन बालबालिका रहेको बताएको छ । पेट्रोल स्टेशनको अगाडि एउटा कार पार्कमा आगलागी सुरु भएको बताएको र सोही आगो फैलिदा यति ठुलो धनजनको क्षति हुने गरि विष्फोट भएको हो । आगो ६०० वर्ग मिटर (६,४६० वर्ग फुट) क्षेत्रमा फैलिएको र थप विस्फोटको खतरा रहेको थियो । मखाचकला राजधानी मस्कोबाट करिब १,६०० किलोमिटर टाढा पर्छ ।
