कम्बोडियाको प्रधानमन्त्रीमा हुन मानेट नियुक्त भएका छन् । उनलाई कम्बोडियाली राजा नोरोदोम सिहामोनीले सोमबार प्रधानमन्त्रीमा नियुक्त गरेका हुन् । उनी करिब चार दशक कम्बोडियामा शासन गरेका हुन सेनका जेठा छोरा हुन् ।
सेनले हालै आफू अब प्रधानमन्त्री नबन्ने र छोरालाई सत्ता हस्तान्तरण गर्ने घोषणा गरेका थिए । यसरी हेर्दा कम्बोडियामा प्रधानमन्त्री पद पुर्ख्याैली विरासत पाएजस्तो देखिए पनि सत्ताधारी दलले गति जुलाइमा भएको संसदीय निर्वाचनमा हुनसेनको दलले जितेपछि उनको उत्तराधिकारीको रूपमा हुन मानेट प्रधानमन्त्री बन्न पाएका हुन् ।
कम्बोडियामा गत जुलाई २३ मा भएको संसदीय चुनावमा सेनको दल कम्बोडियन पिपुल्स पार्टी (सीपीपी) ले १२५ मध्ये १२० सिट जितेको दाबी गरेको छ । यद्यपि, निर्वाचन आयोगले आधिकारिक रूपमा परिणाम घोषणा यही अगस्ट ९ मा गर्ने भएको छ ।
हुनसेन सन् १९८५ देखि कम्बोडियाका प्रधानमन्त्री छन् । ७० वर्षीय हुन सेनले आफ्नो राजनीतिक दलले संसदीय चुनावमा विजयी भएको दाबी गरेको तीन दिनपछि टेलिभिजन सम्बोधनमा उक्त घोषणा गरेका थिए । उनले आफ्नो ४५ वर्षीय जेठो छोरा जनरल हुन मानेट आफ्नो उत्तराधिकारी हुने घोषणा गरेका थिए । हुन मानेट यसअघि कम्बोडियन सेनाका कमान्डर थिए । उनले हालैको निर्वाचनमा सीपीपीको प्रमुख प्रचारकको भूमिका निर्वाह गरेका थिए ।
