कुवेत-पर्यटक भिसामा कुवेत आई काम गर्दै आएका र महिनौंदेखि तलब नपाएको कारण सल्मियाको एउटा भवनको २५ औं तलाबाट हाम फालेर आत्महत्या गर्ने धम्की दिने १३ जना टर्कीस नागरिकलाई देश निकाला(डिपोर्ट) गरिने भएको छ ।
पर्यटक भिसामा कुवेत आएर काम गरेका ति टर्किस नागरिकको प्रवेशको उद्देश्य भ्रमण मात्र भएको सुरक्षा निकायले बताएको अरब टाइम्सले लेखेको छ । ‘उनीहरूलाई काममा लगाउने कम्पनी विरुद्ध कानुनी कारबाही गरिएको सुरक्षा निकायले बताएको छ । ति १३ टर्किस नागरिकले २५ औं तलाबाट हाम फालेर आत्महत्या गर्ने धम्की दिएपछि सुरक्षा अधिकारी र दमकल घटनास्थलमा पुगेको र सम्बन्धित कम्पनीका सञ्चालकले श्रमिकलाई आत्महत्या गर्नबाट वञ्चित गर्दै तत्काल तलब दिने वाचा गरेको सुरक्षा निकायले बताएको छ ।
सुरक्षा निकायले टर्कीका नागरिकले पर्यटक भिसा लिएर सबै सीमानाबाट देश प्रवेश गर्न सक्ने तर श्रम कानूनअनुसार पर्यटक भिसा बाहकले यहाँ काम गर्ने अधिकार नभएको बताएको छ ।
