Thursday 30th June 2022

म पनि स्वतन्त्र पार्टी


तोयानाथ उपेक्षित, तीतोपाटी/देशले विगत १० वर्षदेखि दिल्लीलाई हेरिरहेको छ । विगत ६ महिनायता पञ्जावलाई हेरिरहेको छ । सर्वसाधरणले मात्र हैन त्यति बेला नै दिल्लीलाई हेरेर बाबुराम भट्टराईले नयाँ शक्ति पार्टी खोले तर उनलाई जनताले पत्याएनन् । त्यसपछि रविन्द्र मिश्र आए उनी झनै बरबाद भए । पत्रकारिताबाट राजनितीमा आएका मिश्र पछि अहिले रबी लामिछाने आएका छन् ।

बाबुरामको बौद्धिकतासँग हिंसाको लामो श्रृखला जोडिएकाले सय मुसा मारेको विरालाले हज गएर आउदैमा मुसा नमार्ला भनेर कसरी पत्याउने ? कुनै  जनताले पनि उनी साधु भए भन्दा मान्न तयार भएनन । धन्य धन्य उनले काठमाण्डौको मेयरमा उमेद्वारी दिएनन, चर्चा त निक्कै थियो । यदि दिन्थे भने उनले आफ्नो पछाडी ती हिंसा देखेर अघाएका मुसाहरुले उनलाई नांगोबाबा बनाई दिने थिए जोगिए विचरा ।

रविन्द्र मिश्र त्यसरी नै हौसिए । उनको बौद्धिकता प्रश्न गर्नमा थियो त्यही देखियो उत्तर दिने ठाउँमा उनलाई प्रतिस्थापन गर्न जनताले रुचाएनन् अर्थात उनी पत्रकारीताका लागि जन्मेका थिए राजनितीको लागि थिएनन भनेर जनताले अस्वीकार गरे । मिश्रसँग शुरुमा धेरै आशा गरेका जनताले उनको दोधारे नीतिबाट धेरैले शंका गर्न थालेका थिए । संसदीय दाउपेचका क्रममा उनको समर्थन कांग्रेस नजिक देखिएपछि रविन्द्रको उचाई घट्न थालेको थियो । पछिल्ला दिनमा उनी राजावादी नजिक भए । यहि ढुलमुले नीतिले उनलाई अस्वीकृत गर्दै लग्यो । उनले त्यस अवधिमा समान सोच र विचार भएको पार्टीसँग एकता भन्दै विवेकशील साँझासँग एकता गरे तर टिकाउन सकेनन र विभाजनको खेल खेले त्यसले नेता हुने उनको राजनैतिक योग्यतामा प्रश्न उठाई दियो । अरुलाई भन्थे मिश्रले तर आफ्नै छाती कुखुराको जस्तो छ भनेर आफैले देखाई दिए । अन्तत छोटो समयमा नै उनी आफ्नै असक्षमताले गले । जसका लागि उनलाई राजनीतिबाट पन्छने बहाना चुनावी परिणाम भई दियो । उच्च नैतिकताको जलप लगाउदै घाडो भएको राजनैतिक नेतृत्वबाट उनी पन्छिए । यो कुराको जानकार उनी पहिल्यै थिए । चुनावमा नराम्रो मत आउछ भन्ने उनलाई राम्ररी थाहा थियो । नेतृत्व गर्न वा पार्टी चलाउन नसकिरहेका मिश्रले लुतो पखाल्ने उपयुक्त मौका स्थानीय चुनावको पराजयलाई बनाए र राजीनामा गरे ।

देशमा बेथीति व्याप्त भएको बेला यहाँ राजनेता र राजनितीको खडेरी परेको छ । मुलुक विस्तारै पराधिनताको शिकार हुने बाटोमा हिडिरहेको छ यस्तो अवस्थामा यीनै दल र तिनका दलाल नेता अब चाहिन्न भन्ने संदेश स्थानीय चुनावमा जनताले दर्शाएको पाएपछि सञ्चारकर्मी रबी लामेछाने मैदानमा उत्रिएका छन । उनले अरुले जस्तो स्वतन्त्र उमेद्धारी मात्र दिदै छैनन । स्वतन्त्र भन्ने शव्दलाई नै अर्थात देशै भरी रहेका कुनै दलको दलदलमा नफसेका क्षमतावान युवाहरुको नेतृत्व लिने हिसावले आफ्नो पार्टीको नाम नै राष्ट्रिय स्वतन्त्र पार्टी गठन गरि दिएका छन । अब कुनै पनि मानिस मुलुकमा स्वतन्त्र हुने छैन उसको स्वतन्त्रता रबी सँग समाहित भएको मानिने गरी उनले पार्टीको नामाकरणमा नै चातुर्यता देखाई सकेका छन ।

“माने मान नमाने समात्छु तेरा कान” भने झै कुनै पार्टीमा नभएका सवै स्वतन्त्र रबीको पार्टीको हिस्सा भईसकेका छन । म पनि अब त्यसैको एउटा सदस्य स्वत भएको महसुस गर्दैछु । त्यसमा मेरो विरोध र समर्थनको कुनै अर्थ छैन । किनकी अब म स्वतन्त्र रहिन । स्वतन्त्र शव्दको अपहरण भईसकेको छ । अब स्वतन्त्र शव्दको ठाउँमा कुनै विद्धानले अर्को शव्द जन्माए हेरौला ।

रबी लामिछानेलाई सफल राजनैतिक भविश्यको लागि शुभकामना छ । उनले टेलिभिजनका पर्दाहरुमा लामो समयसम्म लगातार रुपले राजनैतिक दल, सरकार र कर्मचारी संयन्त्र तथा सुरक्षा निकायहरुको खबरदारी गरेर जनताको मन जितेका छन । औपचारिक शिक्षाको उच्च डिग्री उनको हातमा नभए पनि उनको तार्किकता र बौद्धिकतामा कुनै कमि देखिन्दैन । उनले बेथितिका विरुद्धमा देशलाई ठुलो आवाज दिएका छन । उनले ठुलो जनविश्वास जितेका छन । अब उनलाई राजनितीमा आउन पर्छ भन्नेहरुलेका लागि एउटा ऐतिहासिक मौका आएको छ हेरौ खुलेर सहयोग गर्दछन या लुकेर । धरानका मेयर हर्क साम्पांगलाई झै रबीलाई लुकेर भोट दिएर पुग्दैन । किनकी उनले आफू जस्तै सोच राख्ने तमाम युवाहरुलाई साथमा लिएर हिड्न चाहेका छन र त्यो आँट एवं हिम्मतकासाथ नयाँ पार्टी नै बनाएर राजनीतिमा होमिएका छन ।

यो पक्का हो अब ‘रबी’ र उनको पार्टीमाथि उपहास र घनघोर आक्रमण दुवै एकै पटक हुनेछ । राजनीतिलाई पुर्ख्याैली बपौती ठानेर बसेका दलहरुको हेडक्वाटरमा भुकम्प जान थालेको हुँदा अब सवै दल अघोषित रुपमा स्वतन्त्र उमेद्धार वा स्वतन्त्र पार्टीका विरुद्धमा खनिनेछन । उनीहरुको आक्रमणलाई रबीले थेग्न सक्ने हुन होईनन त्यो भविष्यले बताउने छ । तर रबीको तयारी हेर्दा भने नेपालमा उनको पार्टीले भारतमा उदाउदो आम आद्मी पार्टीको रुप नलेला भन्न सकिन्न । राजनैतिक दलहरुको जनतासँग सम्बन्ध टुटदै गएको, राष्ट्रघाती काममा अघि सरेको, महंगीले आकाश छोएको बेला र चुनाव पनि नजिकिएको बेला उनको दलको गठन उपयुक्त समयको उपज हुन सक्ने देखिन्छ ।


Loading...
सम्बन्धित शीर्षकहरु

लुलु समुहका बजार तथा संचार निर्देशक वि. नन्दकुमार यस क्षेत्रको उत्कृष्ट अवार्ड "रिटेल मार्कम ICON'22" बाट सम्मानित भएका छन् ।…

"पाँच तत्त्व पाँचै विकार, पञ्चाङ्ग नै ठिक आधार" विधा :- पञ्चाङ्ग अभ्यास गर्ने थलो :- पञ्चाङ्ग पाठशाला मिति:- २०७९/ ०३/०१४…

ताजा र तार्किक जुनेलीहरू (१) गरेर ध्यान बढ्दैछ ज्ञान। (२) गरेरै काम कमाउँ नाम। (३) सबै भो पूरा जुनेली कुरा।…

प्रतिकृयाहरू