एएफसी एसियन कप छनोट प्रतियोगिता अन्तर्गत आफ्नो दोस्रो खेलमा नेपालले श्रीलंकालाई ८-० गोलले पराजित गरेको छ । उज्वेकिस्तानमा भएको खेलमा नेपालले श्रीलंकालाई ८-० गोलअन्तरले पराजित गरेको हो । नेपालका लागि कप्तान सावित्रा भण्डारी “साम्बा”ले ह्याट्रिक गरेकी थिइन् । साम्बाले खेलको २० औं, ४२औं र पहिलो हाफको इन्जुरी समयमा गोल गरिन । साथै गीता रानाले २, पूजा राना, निशा थोकर र रेखा पौडेलले एकएक गोल गरेका थिए । पहिलो हाफ सम्म ४ गोल गरेको नेपालले दोस्रो हाफमा थप ४ गोल गरेको थियो । गीताले खेलको सातौं र ५४औं, पूजाले ८९औं, निशाले ६२औं र रेखाले ७८औं मिनेटमा गोल गरेका थिए ।
यसअघि आफ्नो पहिलो खेलमा नेपालले लाओसलाई ९–० को गोलअन्तरले पराजित गरेको थियो । नेपालले अब शुक्रबार आयोजक उज्वेकिस्तानसँग खेल्नेछ । उज्वेकिस्तानलाई हराउन सके नेपाल सन् २०२६ मा हुने एएफसी महिला एसियन कप फुटबलका लागि छनोट हुनेछ ।
