चर्चित हास्यकलाकार केदार घिमिरे अर्थात “माग्ने बुढा”को शिर्ष भूमिका रहेको नेपाली चलचित्र “माग्ने राजा” को टिजर सार्वजनिक भएको छ। आउदो भदौ ६ गतेबाट नेपाल र विदेशमा एकसाथ प्रदर्शनमा आउने तयारीमा रहेको चलचित्रमा केदार घिमिरेलाई नयाँ रुप, नयाँ यात्रा उनले निभाएको भूमिकालाई लिएर फेरी चर्चा शुरु भएको छ।
टिजर हेर्दा उनले लगाएका ड्रेस, रमाइला र कसिला संवादले भरिएको देखिन्छ, जसको प्रमुख आकर्षण केन्द्रबिन्दु “माग्ने बुढा” नै रहेका छन । टिजरमा ‘माग्ने बुढा’ र ‘तक्मे बुढा’ एकै चलचित्रमा देखिएका छन । चलचित्रमा विल्सन विक्रम राई “तक्मे बुढा” केदार घिमिरे “माग्ने बुढा”को भान्जाको भूमिकामा देखिएका छन्। टेलिभिजनको पर्दामा दर्शकले साह्रै मन पराएका यो मामा-भान्जाको जोडीलाई फेरि चलचित्रमा देख्न पाउनेछन । टिजरमा वर्षा सिवाकोटी र शिशिर वाङ्देल पनि देखिन्छन तर उनीहरु कस्तो भूमिकामा प्रस्तुत भएका छन, त्यो भने चलचित्र निर्माण पक्षले गोप्य राखेको छ ।
ऋषि लामिछानेको निर्देशन रहेको चलचित्र आरम्भ प्रोडक्सन ब्यानरमा मुनाल घिमिरेले प्रस्तुत गरेका हुन् । चलचित्रको कथा सामीप्यराज तिमल्सेनाले लेखेका हुन्। चलचित्रमा नरेन्द्र मैनालीको छायांकन, सुजिल कर्माचार्यको पार्श्व संगीत र मित्र गुरुङको सम्पादन रहेको छ। चलचित्रको टिजर साहिल खानले तयार पारेका हुन्। चलचित्र ‘माग्ने राजा’ लाई आरआर फिल्मसले वितरण गर्ने निर्माण पक्षले जनाएको छ ।
टिजर हेर्न क्लिक गर्नुहोस
