कहीँ नभएको कुरा नेपालमा हुन्छ

तोयानाथ उपेक्षित, तीतोपाटी / नेपालका बहालवाला मन्त्रीहरुको बोली सुन्नु भएकै होला, पुलिसको हवल्दार, सिनेमाको गेटकी, गाडीको खलासी र कैदीको नाइकेको जस्तै स्तरको लाग्छ । तपाईलाई तिनका अभिव्याक्ति जस्तो लागे पनि कसैले केही भनेर केही हुनेवाला छैन । तीनका नेताहरुको आर्शिवाद र झोले कार्यकर्ताको जयजयकार रहेसम्म हामीले त्यस्तालाई पनि मन्त्री नै मान्नु पर्दछ । यति साह्रो सोझो र क्षमाशिल जनता नेपालमा मात्र पाईन्छ । अनि त्यस्ता मन्त्रीहरु नेपालमा मात्र भेटिन्छन् ।

असारको पन्ध्रमा हिलो खेल्ने बहानामा अर्काका श्रीमति समात्ने यो देशकै मन्त्री थिए । सेक्युरिटी प्रिन्टिंग प्रेसमा भएको बार्गेनिंगमा कर्मचारीलाई फोहरी शव्द प्रयोग गरेर बोल्ने कुनै बेला सरकारका प्रवक्ता थिए । रक्सीको बोतल सहित आफ्नै सचिवालयका महिला कर्मचारीका कोठामा राती राती पुग्ने हाम्रै देशका तत्कालिन बहालवाला सभामुख थिए । कर्सी उठाएर संसदमा झटारो हान्ने माननिय अहिले बहालवाला अर्थमन्त्री छन । मान्छे तुरुन्तै उठाई दिन्छु तँ कहाँ छस चीनी खाने र जाड खाने फलाना भन्दै अश्लिल शव्दको प्रयोग गर्ने बहालवाला मन्त्रीको वोली सार्वजनिक भई सक्दा पनि उक्त पद त्याग्न पर्ने कुनै नैतिक र कानूनी बाध्यतामा उनी छैनन् ।

हो यस्ता नर्क खान लायक नेताहरुले नेपाली जनतालाई स्वर्ग दिलाई दिन्छु भन्दा पत्याउने र ताली लगाउने जनता अन्त कहीँ छैनन नेपाल मै छन । जिउँदै चिम्नीमा मान्छे पोल्नेहरुलाई कारबाही गर्न हुन्न भनेर जुलुस लगाउने जनता हाम्रै देशमा छन । भ्रष्टचार गरेर अकुत कमाउने छुट अन्त कहि छैन नेपाल बाहेक । तर तिनलाई सय किलाको माला उनेर जेलमा स्वागत गर्ने परम्परा पनि नेपाल मै छ ।

साम्राज्यवादी, विस्तारबादी भन्दै अमेरिका र भारतलाई गाली गर्न सिकाउने र तिनै सँग भित्रभित्रै साँठगाठ गर्ने माक्सवादी लेलिनबादी दर्शन अन्त कहीँ नभएर नेपाल मै लागु गर्ने अभ्यास हुन्छ । भारतसँग सुरुंग युद्ध गर्ने भन्दै देशमा शसस्त्र युद्ध गर्न लगाउने नेता भने भारत मै सेल्टर हालेर बसेको रोचक ईतिहास अन्त कुनै देशमा पाइँदैन ।

संसदिय प्रणाली भएका मुलुक मध्ये नेपाल मात्र यस्तो देश हो जहाँ प्रधानमन्त्री संसदले नभएर अदालतले तोकिदिन्छ । यहि देशमा कही नभएको अधिकार प्रमले प्रयोग गर्दछन् । अदालतले गरिदिन्छ र नेतादेखि कार्यकतासम्मले नै आफ्नो ईच्छा अनुकुल भए ताली लगाउँछन नभए राँको बाल्छन कानून कसैलाई लाग्दैन, कहीँ नभएको कुरा नेपालमा हुन्छ । क्रमस …….