तितोपाटी- मानव बेचबिखनको गिरोहले नक्कली राहदानी बनाई वैदेशिक रोजगारीमा आकर्षक तलबको प्रलोभनमा पारी एक महिलालाई बिक्री गरेको खुलेको छ । वैदेशिक रोजगारीमा आकर्षक तलब पाउने आश्वासन दिएर महिलालाई भैरहवा नाकाबाट गोरखपुर हुँदै भारत पुर्याएर बिक्री गरेको खुल्न आएको प्रहरीको मानव बेचबिखन अनुसन्धान ब्युरोले जनाएको छ ।
उनीहरूले वैदेशिक रोजगारीको बहानामा दुबईमा मासिक ५० हजार तलब पाउने आश्वासनमा नक्कली भिसा बनाएर पीडितबाट १ लाख ५० हजार र भारतीय नागरिकबाट भारु ३ लाख ५० हजार लिई बिक्री गरेको ब्युरोका प्रमुख दुर्गा सिंहले जानकारी दिइन् ।
उक्त घटनामा भुपालमान श्रेष्ठ र रमेश खड्कालगायत व्यक्ति संलग्न रहेको आरोपमा श्रेष्ठलाई पक्राउ गरी अनुसन्धान थालिएको तथा खड्का भने हाल कारागारमा रहेको पाइएको प्रहरीले जनाएको छ । उनीहरूले दुबईको होटलमा काम गर्न भारतमा थप ११ महिना वेटरको तालिम लिनुपर्छ भनी महिलालाई भारत पुर्याएका थिए । श्रेष्ठले रमेश खड्का भन्ने तुलाराम खड्काको जिम्मा लगाई भारतको नयाँ दिल्ली पुर्याएको अनुसन्धानमा खुलेको छ । त्यसपछि खड्का भारतीय र अरेबियन मानिसको जिम्मा लगाई भारु ३ लाख ५० हजार बुझेर नेपाल फर्किएका थिए ।
उनीहरूले भारतमा ४५ दिनसम्म बन्धक बनाई चरम शोषण गरेको र दार्जिलिङ बस्ने एक व्यक्तिको सहयोगमा भाग्न सफल भई आएर ब्युरोमा जाहेरी दिएको पीडितको भनाइ उद्धृत् गर्दै प्रहरीले जनाएको छ । उक्त जाहेरीका आधारमा खोजतलास गर्दा खड्का अर्कै अपराधमा केन्द्रीय कारागारमा बन्दी जीवन बिताइरहेको पाइएको छ ।
उनीबाट प्राप्त सूचनाको आधारमा श्रेष्ठलाई काठमाडौंको सामखुशीबाट पक्राउ गरी अनुसन्धान थालिएको र अन्य फरार रहेकाको खोजी जारी रहेको ब्युरो प्रमुख सिंहले जानकारी दिइन् । उनका अनुसार पछिल्लो समयमा यसरी वैदेशिक रोजगारीको नाममा मानव बेचबिखनको क्रम बढेको छ । रासस
