तीतोपाटी – तमु समाज कुवेतले यस वर्षको ल्होछार भोली १ जनवरी २०२१ शुक्रबारको दिन कुवेतको जाब्रिया स्थित सेन्ट्रल ब्लड बैंकमा रक्तदान गरेर मनाउने भएको छ ।
“रक्तदान जिवनदान” भन्ने मुलमन्त्रलाइ आत्मसात गर्दै हरेक वर्ष नेपाली समुदाय विच रक्तदान कार्यक्रम संचालन गर्दै आएको तमु समाजले यस वर्ष कोभिड-१९ महामारीको कारण कुनै किसिमका भेला जम्मा र जमघट गर्न स्वास्थ्यको दृष्टिले जोखिमपुर्ण हुने भए पछि समुदायमा भिडभाड हुने कुनै गतिविधि नगरे पनि तमुहरूको महान चाड तमु ल्होछारको अवसरमा भने सामाजिक दूरी राखेर रक्तदान गर्ने संस्थागत निर्णय गरिएको कुरा समाजका संरक्षक खोप गुरूङले तीतोपाटी डट कम संगको कुराकानी बताएका हुन् ।
कुवेतको नेपाली समाजमा पहिलो पटक संस्थागत रूपमा रक्तदान जस्तो पुन्यको काम गरेर अघि बढेको सामाजिक र मानविय सेवाका कार्यमा कटिवद्ध तमु समाज कुवेतले यस अघि ६ पटक सम्म अाैपचारिक रक्तदान कार्यक्रम गरेकोमा यस पटक भने कोभिड महामारिको कारण सामाजिक दूरी कायम गर्नु पर्ने तथा स्वास्थ्य सतर्कता अपनाउनु पर्ने भएकोले तत्कालको लागि औपचारिक रक्तदान कार्यक्रम नगरी समाजका सदस्यहरूले आन्तरिक रूपमा रक्तदान गरेर ल्होछार मनाउन लागे पनि रक्तदान गर्न इच्छुक कुवेतवासी नेपाली दाजुभाइ दिदीबहिनीहरूले कुनै किसिमको भिडभाड नगरी व्यक्तिगत रूपमा रक्तदान जाब्रिया स्थित ब्लड बैंकमा उपस्थित भएमा तमु समाजले स्वागत गर्ने जनाएको छ ।
