तितोपाटी – लाखौँको घुस प्रकरणमा मुछिएपछि आयुक्त पदबाट राजीनामा दिएका राजनारायण पाठकविरुद्ध अख्तियार दुरुपयोग अनुसन्धान आयोग काठमाडाैँले अनुसन्धान गर्न तीन सदस्यीय समिति गठन गरेको छ। अख्तियारका प्रवक्ता रामेश्वर दंगालले सहसचिवको नेतृत्वमा तीन सदस्यीय समिति गठन गरेर पाठकविरुद्ध अनुसन्धान सुुरु गरिएको बताए। कानून अनुसार पाठकमाथि कारवाही गर्न सबै तिर कुरा उठिरहेको बेला अख्तियारले औपचारिक रुपमै अनुसन्धान सुुरु गरेको छ। प्रवक्ता दंगालले भने,‘पाठकमाथि लागेको घुस प्रकरणको विस्तृत अनुसन्धान गठित समितिले सुरु गरेकाे छ।’
अख्तियारले महान्यायाधिवक्ताको कार्यालयसँग परामर्श गरी अनुसन्धान सुुरु गरेको स्रोतले बताएको छ। अख्तियारले सोमबार महान्यायाधिवक्ता कार्यालयसमक्ष मुद्दा कसरी चलाउने भन्ने विषयमा राय माग गरेको थियो। महान्यायाधिवक्ता कार्यालयले संविधानमा सार्वजनिक पद धारण गरेको व्यक्तिले भ्रष्टाचार गरेको ठहरिएमा मुद्दा दर्ता गर्न सक्ने व्यवस्था भएकाले सोहीअनुसार अगाडि बढाउन सक्ने राय दिएको दिएपछि अख्तियारले अनुसन्धान कमिटी गठन गरेकाे हाे।
नेपाल इञ्जिनियरिङ कलेजमा भएको भ्रष्टाचार मिलाइदिने शर्तमा उनले ७८ लाख रुपैयाँ घुस लिएको सार्वजनिक भएपछि पाठकले गत शुक्रबार पदबाट राजीनामा दिएका थिए ।
