तीतोपाटी- शनिबार दिउँसो काठमाडौंको तीनकुने गैरीगाउँस्थित सुकम्बासी टोलका बिक्की लिम्बूको हत्यामा संलग्न भएको आशंकामा प्रहरीले दुई जनालाई पक्राउ गरेको छ ।
घटनामा संलग्न भएको आशंकामा प्रहरीले मकवानपुरको अर्नामाडी–४ घर भई काठमाडौंको गौशाला बस्दै आएका २९ वर्षीय मनिष बानियाँ र काठमाडौंको तार्केश्वर नगरपालिका–७ साङ्लाका २४ वर्षीय महेश परियारलाई पक्राउ गरेको हो।
प्रहरी नायव उपरिक्षक रुगम बहादुर कुँवरको कमाण्डमा खटिएको टोलीले साङ्लाको बिहानीचोकमा लुकेर बसेको अबस्थामा शनिबार राती नै उनीहरुलाई पक्राउ गरेको हो।
अनुसन्धानको क्रममा मृतक तथा घाईते अनिल श्रेष्ठसँग मनिष बानियाँको आर्थिक लेनदेन रहेको खुलेको छ। सोही विषयमा बिबाद हुँदा घटना भएको प्रहरीले जनाएको छ। पक्राउमा परेकामध्ये मनिष बानियाँ यस अघि पनि ज्यान मार्ने उद्योग र लागू औषध मुद्दामा पक्राउ परी छुटेका व्यक्ति हुन्।
बागमती वारि र पारिका दुई सुकुम्बासी बस्तीका युवाबीच शनिबार दिउँसो झडप हुँदा बिक्की लिम्बूको मृत्यु भएको थियो। घटनामा घाइते भएका २३ वर्षीय अनिल श्रेष्ठको राष्ट्रिय ट्रमा सेन्टरमा उपचार भइरहेको छ।
