तितोपाटी – अमेरिकाका प्रहरीको गोली प्रहारबाट एक नेपालीको मृत्यु भएको छ ।
शनिबार साँझ पौने ९ बजे नेपाली नागरिक वीरेन्द्र ठकुरीको प्रहरीको गोली प्रहारबाट मृत्यु भएको हो । हात हतियार केही पनि नभएको अवस्थामा ठकुरीलाई गोली हानेको भन्दै अमेरिकामा बस्ने नेपाली समुदायले आपत्ति जनाएका छन् ।
ब्रुमफिल्डस्थित फ्रेडलल बर्ड र स्टार्टफोर्ड लेक ड्राइभमा प्रहरीले उनीमाथि गोली हानेको थियो । स्थानीय सञ्चार माध्यमका अनुसार सडकमा होहल्ला भएपछि प्रहरी पुगेको थियो ।
प्रहरीको आदेश नमानेपछि उनलाई गोली हानिएको स्थानीय सञ्चारमाध्यमले जनाएका छन् । मिडिया रिपोर्टमा उल्लेख गरिए अनुसार गोली हान्ने प्रहरीलाई नियमानुसार विदामा बस्न लगाइएको छ ।
ठकुरीको गैरन्यायिक हत्या भएको भन्दै नेपाली समुदायले थप अनुसन्धान र कानुनी उपचारको बाटो खोज्नेबारे छलफल गरिरहेका छन् । अमेरिकामा प्रहरीको शरीरमा पनि क्यामरा राखिएको हुन्छ ।
