तितोपाटी – पाकिस्तानको बलोचिस्तान प्रान्तको क्वेट्टा शहरमा चुनाव चल्दै गर्दा भएको बम विस्फोटमा ३१ को मृत्यु हुनुका साथै दर्जनौं घाइते भएका छन् ।
मृत्यु हुनेमा पाँच जना प्रहरी तथा दुइ बालक पनि रहेकाे स्थानीय डन डट कमले जनाएकाे छ ।
मतदाताहरु पूर्व क्रिकेटर इमरान खान र पूर्व प्रधानमन्त्री नवाज शरिफको दलमा विभक्त छन् ।
यत्रतत्र स-साना विष्फोट तथा दुर्इ दलका समर्थकबीच झडप पनि भइरहेको छ ।
चुनावको प्रचार प्रसार र मतदानलाई धाँधली र झडपका कारण ओझेलमा परेको छ । पाकिस्तानको मानव अधिकार आयोगले चुनाव बिथोल्न नकारात्मक र हिंसात्मक प्रयासहरु भइरहेको जनाएको छ ।
देशभरमैे कडा सुरक्षा कायम गर्न तथा मतपेटिकाको रक्षा गर्न ३ लाख ७० हजार भन्दा बढी सुरक्षाकर्मी परिचालन गरिनुकाे बावजूद हिंसा भड्किएको हो ।
बलोचिस्तान प्रान्तको क्वेट्टामा भएको विष्फोट एउटा निर्वाचन केन्द्रको ढोका अगाडि सुरक्षाकर्मीलाई लक्षित गरिएको आत्मघाती प्रयास भएको स्थानीय अधिकारीहरुले बताएका छन् ।
यसै महिनामा भएको पछिल्लो बम विष्फोटमा १४९ जनाको ज्यान गएको थियो जसलाई अहिलेसम्मकै क्रुरतापूर्ण आत्मघाती विष्फोट मानिएको थियो । यो घटनाको इस्लामिक स्टेटले जिम्मेवारी लिएको थियो ।
