Wednesday 18th November 2026

अफगानिस्तानमा उग्रवादी अाक्रमण, १९ जनाको मृत्यु


तितोपाटी –  अफगानिस्तानको जलालाबादमा आइतवार सिख र हिन्दूहरूमाथि आत्मघाती आक्रमण गरिएको छ । आक्रमणमा १९ जनाको मृत्यु भयो भने २० जना घाइते भए ।

यी हिन्दू तथा सिखहरू राष्ट्रपति अशरफ गनीलाई भेट्न गइरहेका थिए ।

नंगरहार प्रान्तका प्रवक्ता इनामुल्ला मियांखलीले आक्रमणमा ११ सिख, ६ हिन्दू तथा दुई अन्य अल्पसंख्यक धर्मावलम्बी रहेको बताएका छन् ।

अस्पतालमा भर्ना गरिएका नरेन्द्र सिंहले बताएअनुसार उनीहरूलाई नै लक्षित गरिएर आक्रमण भएको थियो । उनका पिता अवतार सिंह खालसाको आक्रमणमा मृत्यु भयो । खालसा अक्टोबरमा हुन लागेको निर्वाचन लड्न चाहिरहेका थिए ।

प्रान्तीय गभर्नर अतातुल्लाह खोगयनीले बताएअनुसार, चर्को विस्फोटका कारण नजिकैका अनेकौं भवन र पसलमा क्षति पुगेको छ । विस्फोटभन्दा केही घन्टाअघि गनीले शहरमा एक अस्पताल उद्घाटन गरेका थिए ।

अहिलेसम्म कुनै पनि आतंकवादी संगठनले आक्रमणको जिम्मेवारी लिएको छैन तर तालिबान र आईएससँग आबद्ध गठन नंगरहारमा सक्रिय छन् । इस्लामिक कट्टरपन्थीहरूले लामो समयदेखि अल्पसंख्यकहरूलाई निशाना बनाउँदै आएका छन् ।

सन् १९७० को दशकमा अफगानिस्तानमा हिन्दू र सिख समुदायका मानिसको संख्या ८० हजारभन्दा बढी थियो तर त्यो घटेर अहिले जम्मा एक हजारमा समेटिएको छ ।

सन् १९९० को दशकमा तालिबानको जगजगी हुँदा अल्पसंख्यकलाई पहिचानका लागि पहेंलो ब्यान्ड लगाउन लगाएका थिए । केही वर्षयता अफगानिस्तानमा भएका हिन्दू तथा सिखहरूले भारतमा शरण मागेका छन् ।

एजेन्सी


सम्बन्धित शीर्षकहरु

-गोबिन्द राज ओझा (राजन ) अनन्त आकाशबीच चम्किने ताराका ज्योति हौँ हामी सबै, प्रकृतिका कणकणभित्र लुकेको चेतनाका मोती हौँ हामी…

कुवेतमा आयोजनामा हुन गइरहेको प्रथम मुजैनी–पूर्वेली टाइगर गोल्ड कप २०२६ फुटबल पर्व–मेला को सम्पूर्ण तयारी अन्तिम चरणमा पुगेको आयोजकले जनाएको…

भारतको सर्वोच्च अदालतमा बुधबारदेखि वैवाहिक बलात्कारसम्बन्धी १० वटा रिटमाथि सुनुवाइ भइरहेको छ। विवाहभित्र हुने जबर्जस्ती यौनसम्पर्कलाई अपराध मान्ने कि नमान्ने…

प्रतिकृयाहरू
...