एकता सेवा सहयोगी समूह (नेपाल) ले उपचाररत बालिका सपना विश्वकर्माको स्वास्थ्य उपचारका लागि रु. ६३ हजार ५८१ आर्थिक सहयोग प्रदान गरेको छ।
दुखकोशी गाउँपालिका निवासी ९ वर्षीया सपना विश्वकर्मा गम्भीर स्वास्थ्य समस्याबाट पीडित रहेकी छन्। उनको पारिवारिक आर्थिक अवस्था कमजोर रहेको र उपचारका लागि आर्थिक सहयोग आवश्यक रहेको अवस्थामा समूहले मानवीय अभियान सञ्चालन गरी सहयोग रकम संकलन गरेको जनाएको छ।
समूहका अनुसार संकलित रु. ६३ हजार ५८१ रकम २०८३ असोज २३ गते (अक्टोबर ९, २०२६) सपना विश्वकर्माको उपचार सहयोगार्थ हस्तान्तरण गरिएको हो। समूहले सपनाको शीघ्र स्वास्थ्य लाभको कामना गर्दै सहयोग अभियानमा सहभागी सम्पूर्ण दाताप्रति आभार व्यक्त गरेको छ।
एकता सेवा सहयोगी समूह (नेपाल) ले सामाजिक उत्तरदायित्व तथा मानवीय सेवालाई आफ्नो प्रमुख अभियानको रूपमा अघि बढाउँदै आएको उल्लेख गर्दै विपन्न, असहाय तथा उपचारको आवश्यकता भएका व्यक्तिहरूको सहयोगमा निरन्तर सक्रिय रहने प्रतिबद्धता जनाएको छ।
समूहले सानो सहयोगले पनि ठूलो परिवर्तन ल्याउन सक्ने विश्वास व्यक्त गर्दै आगामी दिनमा समेत यस्ता सामाजिक तथा मानवीय कार्यलाई निरन्तरता दिने जनाएको छ।
