फ्रान्समा विद्यालयको अवस्था सुधार र शिक्षक अभावको विरोधमा भइरहेको विद्यार्थी प्रदर्शनका क्रममा १५ वर्षीय एक विद्यार्थी गम्भीर घाइते भएका छन्। उत्तरी सहर लेन्समा प्रहरी र प्रदर्शनकारीबीचको झडपका क्रममा उनको हात विस्फोट भएर छुट्टिएको बताइएको छ।
घटनाको वास्तविक कारणबारे अनुसन्धान भइरहेको छ। विद्यार्थीको ज्यान भने खतरामुक्त रहेको अधिकारीहरूले जनाएका छन्।
देशभर जारी प्रदर्शनका कारण सोमबार करिब ५०० विद्यालय आंशिक वा पूर्ण रूपमा बन्द भएका थिए। हालसम्म प्रदर्शनका क्रममा १९० भन्दा बढी विद्यार्थी घाइते भएका छन् भने ५ हजारभन्दा बढी मानिस पक्राउ परेका छन्, जसमध्ये अधिकांश नाबालिग छन्।
