जापानको ओकिनावा टापुस्थित एक होटलमा एक महिलाको हत्या भएको आशंकामा २० वर्षीय अमेरिकी मरीन सैनिकलाई प्रहरीले पक्राउ गरेको छ।
३९ वर्षीया महिलाको शव शनिबार बिहान होटलको कोठामा फेला परेको थियो। प्रहरीका अनुसार उनको हत्या भएको देखिन्छ। होटलको सीसीटीभी फुटेजमा ती महिला एक विदेशी पुरुषसँग कोठामा प्रवेश गरेको र पछि ती पुरुष महिलाका सामान लिएर बाहिर निस्किएको देखिएको छ।
घटनापछि जापान सरकारले अमेरिकी राजदूतलाई बोलाएर कडा विरोध जनाएको छ। जापानकी प्रधानमन्त्री सनाए ताकाइचीले घटनालाई “अत्यन्त क्रूर र जघन्य” भन्दै अमेरिकासँग कडा विरोध जनाएकी छन्। साथै घटनाको पूर्ण अनुसन्धान र भविष्यमा यस्ता घटना दोहोरिन नदिन कदम चाल्न आग्रह गरेकी छन्।
अमेरिकी मरीन कोरले घटनाप्रति गम्भीर चासो व्यक्त गर्दै जापानी अधिकारीहरूसँग अनुसन्धानमा सहयोग गरिरहेको जनाएको छ।
ओकिनावामा अमेरिकी सैनिकको उपस्थितिलाई लिएर यसअघि पनि स्थानीय बासिन्दाबीच असन्तुष्टि देखिँदै आएको छ।
