म्याग्दीको अन्नपूर्ण गाउँपालिका क्षेत्रमा कालीगण्डकी नदीमा आएको बाढीले पोखरेबगर र नौलीबगर जोड्ने पुल बगाएको छ। पुल बगेपछि अन्नपूर्ण गाउँपालिकाका वडा नम्बर २, ३ र ४ सहित मुस्ताङसँगको सडक सम्पर्क विच्छेद भएको छ।
यस्तै, अन्नपूर्ण–५ गिवाङ र अन्नपूर्ण–३ फगाममा पहिरोले दुई घर पुरिएका छन्। घरमा परेका दुई जनाको खोजी कार्य जारी रहेको जनाइएको छ।
बेनी–जोमसोम सडकको खामभित्तामा कालीगण्डकी नदीले सडक कटान गरेको छ भने अन्नपूर्ण–४ घरापस्थित निलगिरि आधारभूत विद्यालयमा पनि क्षति पुगेको छ। स्थानीय प्रशासन र सुरक्षाकर्मीले प्रभावित क्षेत्रमा उद्धार तथा क्षति मूल्याङ्कन कार्य गरिरहेका छन्।
