लगातारको वर्षा र पहिरोका कारण देशका विभिन्न राजमार्ग तथा सडकखण्ड प्रभावित भएका छन्। सडक विभागका अनुसार पूर्वपश्चिम राजमार्गको भाइरलडाँडामा सडक अवरुद्ध भएको छ भने पहिरो हटाउन मेसिन परिचालन गरिएको छ।
पृथ्वी राजमार्गका कृष्णभीर, चौकीभीर, फिस्लिङ र चालिसेलगायत क्षेत्रमा सडक अवरुद्ध भएपछि रातिको समयमा सवारी सञ्चालन रोकिएको छ। यस्तै, बीपी राजमार्गका विभिन्न स्थानमा पहिरो र डाइभर्सन बग्दा यातायात प्रभावित बनेको छ।
मध्यपहाडी राजमार्ग केही स्थानमा एकतर्फी सञ्चालनमा रहेको छ भने कालीगण्डकी करिडोरमा लामो दूरीका सवारीसाधन सञ्चालनमा रोक लगाइएको छ। तमोर, राप्ती र कर्णाली राजमार्गका विभिन्न खण्ड पनि पहिरोका कारण प्रभावित भएका छन्।
सडक विभागले अवरुद्ध सडक खुलाउन मर्मत तथा पहिरो पन्छाउने काम तीव्र रूपमा भइरहेको जनाएको छ।
