पाकिस्तानले अफगानिस्तानका १० स्थानमा हवाई तथा ड्रोन हमला गरेको जनाएको छ। पाकिस्तानका सूचनामन्त्री अताउल्लाह तरारका अनुसार ती स्थानहरू ड्रोन लन्च गर्ने र भण्डारण गर्ने केन्द्र भएको आशंकामा निशाना बनाइएको हो।
पाकिस्तानले अफगानिस्तानबाट आएका केही ड्रोनहरू आफ्नो हवाई सुरक्षाले लक्ष्यमा पुग्नुअघि नै खसालेपछि जवाफी कारबाहीस्वरूप हमला गरिएको दाबी गरेको छ। उनका अनुसार हमलाहरू निकै सटीक ढंगले गरिएको थियो।
तर अफगानिस्तानको तालिबान सरकारले यी आरोप अस्वीकार गर्दै आफ्नो भूमिबाट कुनै ड्रोन नपठाइएको जनाएको छ। तालिबानका अधिकारीहरूले पाकिस्तानको हमलामा खोस्त र पक्तिया क्षेत्र प्रभावित भए पनि कुनै मानवीय क्षति नभएको दाबी गरेका छन्।
पछिल्ला केही वर्षदेखि पाकिस्तान र अफगानिस्तानबीचको सम्बन्ध तनावपूर्ण रहँदै आएको छ। पाकिस्तानले सीमापार सक्रिय सशस्त्र समूहलाई अफगानिस्तानले आश्रय दिइरहेको आरोप लगाउने गरेको छ भने तालिबान सरकारले यस्तो आरोप बारम्बार अस्वीकार गर्दै आएको छ।
यस घटनाले दुई छिमेकी देशबीचको तनाव थप बढ्न सक्ने चिन्ता व्यक्त गरिएको छ।
