पाकिस्तानका पूर्व प्रधानमन्त्री इमरान खानका तीन दिदीबहिनीलाई प्रहरीले पक्राउ गरेको छ। खानको पार्टी पाकिस्तान तहरीक-ए-इन्साफ (PTI) का अनुसार लाहोरस्थित घरमा छापा मारेर अलेमा खान, डा. उज्मा खान र नोरीन खानलाई नियन्त्रणमा लिइएको हो।
पार्टीका नेताहरूले उनीहरूलाई कोट लखपत जेल, लाहोर पठाइएको बताएका छन्। साथै, पक्राउ परेका बालबालिकालाई भने पछि रिहा गरिएको जनाइएको छ।
पञ्जाब प्रशासनले सार्वजनिक शान्ति कायम राख्नुपर्ने भन्दै तीनै जनालाई ३० दिनसम्म हिरासतमा राख्ने आदेश दिएको छ। यस घटनापछि PTI ले सेप्टेम्बर २७ मा विरोध प्रदर्शन गर्ने घोषणा गरेको छ।
इमरान खान सन् २०२३ देखि जेलमा छन् र उनी भ्रष्टाचारसम्बन्धी मुद्दामा सजाय भोगिरहेका छन्। उनी सन् २०१८ देखि २०२२ सम्म पाकिस्तानका प्रधानमन्त्री थिए।
