अमेरिकी राष्ट्रपति डोनाल्ड ट्रम्पले इरानविरुद्ध “अहिलेसम्मकै सबैभन्दा कडा आर्थिक अभियान” घोषणा गरेका छन्। उनले इरानसँग व्यापार वा आर्थिक सम्बन्ध राख्ने कुनै पनि देश, बैंक, कम्पनी वा संस्थालाई कडा आर्थिक प्रतिबन्ध लगाइने चेतावनी दिएका छन्।
ट्रम्पले इरानमाथि दबाब बढाउन तेल व्यापार, वित्तीय कारोबार र अन्य आर्थिक गतिविधि पूर्ण रूपमा रोक्न सहयोगी राष्ट्रहरूलाई आग्रह गरेका छन्। इरानले भने यो नयाँ कुरा नभएको भन्दै अमेरिकी प्रतिबन्धहरूलाई विगतदेखि नै सामना गर्दै आएको प्रतिक्रिया दिएको छ।
विश्लेषकहरूले चीन, इराक, टर्किए र संयुक्त अरब इमिरेट्स (यूएई) जस्ता इरानका प्रमुख व्यापारिक साझेदारहरू अमेरिकी दबाबको मुख्य लक्ष्य बन्न सक्ने बताएका छन्। यद्यपि, कडा आर्थिक प्रतिबन्धहरू कार्यान्वयन गर्न अमेरिकालाई चुनौतीपूर्ण हुने पनि उनीहरूको भनाइ छ।
