किसन साह, श्रावण २३ गते (मंगलबार) – सर्लाहीमा फरक फरक नदिमा आएको बाढीले बगाउँदा दुई जना बृद्धाको मृत्यु भएको छ ।
अबिरल वर्षाका कारण बागमती नदीमा आएको बाढीले बगाउँदा एक वृद्धको मृत्यु भएको हो । मृत्यु हुनेमा रौतहट जिल्लाको गढीमाई नगरपालिका-२ समनपुरका ६६ वर्षीय सहिद राय भाट रहेको इलाका प्रहरी कार्यालय बरहथवा सर्लाहीले जनाएको छ।
सर्लाही जिल्लाको बरहथवा नगरपालिका अन्तर्गत पर्ने खेतमा काम गर्न आएको र कामकाज सकिएर घर फर्किने क्रममा उनलाई नदीले बगाएको थियो।
भाटलाई बगाउँदै गर्दा स्थानीयवासीले उद्धार गरेका थिए । उद्धार पश्चात् बेहोस अबस्थामा रहेका भाटलाइ उपचारको लागि समनपुर स्थित एक स्वास्थ्य केन्द्रमा उपचार गर्न स्थानीयले लगेका थिए ।
त्यहाँ उपचार सम्भव नभएपछि थप उपचारका लागि रौतहटको चन्द्रपुर पुर्याउँदा चिकित्सकले उनलाई मृत घोषणा गरेका छन ।
त्यस्तै सर्लाही-महोत्तरीको सीमा भएर बग्ने बाँके खोलामा आएको बाढीले बगाउँदा हरिपुर्वा नगरपालिका–७ बसन्तपुरका ६० वर्षीय भोला चौधरीको मृत्यु भएको छ । सोमबार राति नै घर परिवारबाट सम्पर्कविहीन भएका चौधरीको शव मंगलबार खोलामा डुबेको अवस्थामा फेला परेको प्रहरीले जनाएको छ ।
साथै धनकौल गाउँपालिका-४ महिनाथपुरमा सय जना मानिस बाढीमा फसेका छन्। घाँस काट्न गएका स्थानीयहरू दुई नदीको बीचमा फसेका छन्। उनीहरूको उद्धारका लागि सुरक्षा निकाय घटनास्थलमा पुगेको जिल्ला प्रहरी कार्यालय सर्लाहीले जनाएका छन्।
