तितोपाटी – बाग्लुङ र प्युठानमा अविरल वर्षाका कारण झरेको पहिरोमा परि ३ जजनाको मृत्यु भएको छ ।
प्राप्त जानकारी अनुसार बाग्लुङको निसीखोला गाउँपालिका ३ धुर्सौलामा मङ्गलबार राती परेको अविरल बर्षा सँगै आएको पहिरोले एकै घरका सासु बुहारी पुरिएका छन् । पहिरोमा पुरिनेमा ६५ वर्षीया धनकुमारी शाही र ३५ वर्षीया डल्ली शाही रहेका छन् ।
पहिरोमा परेकी धनकुमारीको श्रीमान लेकको भैसी गोठमा बस्दै आएका र छोरो रोजगारीको सिलसिलामा भारत रहेका स्थानीय खीम बहादुर शाहीले बताए ।
पहिरोले घरभिभत्र पुरिएका सासु बुहारीको खोजी स्थानीय र प्रहरीद्धारा भइरहेको जिल्ला प्रहरी कार्यालय बागलुङले जनाएको छ ।
त्यसै गरि प्युठानको गौमुखी गाउँपालिका -४ डाँडागाउँका झलकबहादुर सुनार पहिरोमा पुरिएर बेपत्ता भएका छन् ।
बुधबार बिहान करिब ७ बजे घर माथिबाट खसेको पहिरोमा पुरिएर ३२ वर्षीय झलकबहादुर बेपत्ता भएको जिल्ला प्रहरी कार्यालय प्यूठानले जनाएको छ । बिहान झरेको पहिरोले सोही निवासी देबबहादुर सुनार र रमेश सुनारको समेत घरगोठ बगाएको छ ।
जिल्ला प्रहरी कार्यालयको टोली घटनास्थल पुगि खोजी कार्य भइरहेको स्थानीयबासीले जानकारी दिएका छन् । जिल्लामा केही दिन देखि निरन्तर पानी परिरहेको छ ।
